وزیر اعلیٰ کا جموں میں جے کے ای۔پاتھ شالا ٹیلی ایجوکیشن چینل کا افتتاح

جموں: وزیر اعلیٰ عمر عبداللہ نے آج جے کے ای۔پاتھ شالا ڈائریکٹ ٹو ہوم چینل۵۳کا آغاز کیا، جو ایک مخصوص تعلیمی ٹیلی ویژن چینل ہے اور خاص طور پر جموں و کشمیر کے دور دراز اور پسماندہ علاقوں میں اسکولی تعلیم کو سہارا دینے کے لیے شروع کیا گیا ہے۔
یہ اقدام تعلیمی شعبے میں ایک بڑی تکنیکی مداخلت کی حیثیت رکھتا ہے۔
اس موقع پر وزیر اعلیٰ نے دو نئے ڈیجیٹل اسٹوڈیوز کا بھی افتتاح کیا، جموں و کشمیر کے۱۴؍ اضلاع کو مکمل طور پر خواندہ قرار دیا اور سال۲۰۲۵۔۲۶کے دوران سمگرا شکشا کے تحت مکمل ہونے والے۱۰۱۰ ترقیاتی کام عوام کے نام وقف کیے۔
کنونشن سینٹر میں تقریب سے خطاب کرتے ہوئے وزیر اعلیٰ عمر عبداللہ نے کہا کہ جے کے ای۔پاتھ شالا اسکولی تعلیم کو مضبوط بنانے کے لیے ٹیکنالوجی کے استعمال میں ایک نئے دور کا آغاز ہے۔
تدریسی طریقوں میں تبدیلی پر روشنی ڈالتے ہوئے وزیر اعلیٰ نے اپنے اسکولی دور کو یاد کیا اور کہا کہ ایک وقت تھا جب اوور ہیڈ پروجیکٹر کو بھی بڑی تکنیکی کامیابی سمجھا جاتا تھا۔
وزیر اعلیٰ نے کہا’’ہمارے وقت میں صرف اوور ہیڈ پروجیکٹر والی کلاس میں بیٹھ کر ہمیں لگتا تھا کہ ہم اکیسویں صدی میں داخل ہو گئے ہیں۔ آج ہم تعلیم میں ایک حقیقی تکنیکی انقلاب دیکھ رہے ہیں‘‘۔
اس اقدام پر محکمہ اسکولی تعلیم کو مبارکباد دیتے ہوئے وزیر اعلیٰ نے کہا کہ اگر ٹیکنالوجی کو درست طور پر استعمال کیا جائے تو یہ بچوں کی زندگی بدل سکتی ہے، تاہم انہوں نے واضح کیا کہ ڈیجیٹل پلیٹ فارمز کلاس روم تعلیم کا متبادل نہیں بلکہ معاون ہیں۔
وزیر اعلیٰ نے کہا’’یہ چینل نہ کلاس روم کی جگہ لینے کے لیے ہے اور نہ ہی استاد کی۔ استاد اور کلاس روم کا کوئی نعم البدل نہیں ہو سکتا۔ ٹیکنالوجی کا مقصد خلا کو پُر کرنا اور سیکھنے میں مدد دینا ہے‘‘۔
عمرعبداللہ نے مزید کہا کہ استاد اور طالب علم کے درمیان ذاتی تعلق کسی بھی اسکرین یا آلے سے پیدا نہیں ہو سکتا۔ایک ذاتی واقعہ بیان کرتے ہوئے وزیر اعلیٰ نے یاد کیا کہ کس طرح ایک سخت مگر مخلص استاد نے انہیں سائنس کے خوف پر قابو پانے میں مدد دی۔
وزیر اعلیٰ نے کہا’’اچھے اساتذہ کمزور ترین طلبہ کو بھی اپنی صلاحیتوں کی حدیں عبور کرنے میں مدد دیتے ہیں۔ کوئی بھی ٹیکنالوجی ایک اچھے استاد کا مقابلہ نہیں کر سکتی‘‘۔
عمرعبداللہ نے اساتذہ کی مہارتوں کو مسلسل اپ گریڈ کرنے اور ٹیکنالوجی کو ایک معاون ذریعہ کے طور پر استعمال کرنے کی ضرورت پر زور دیا۔ انہوں نے جے کے ای۔پاتھ شالا پر معیاری اور باقاعدہ طور پر اپ ڈیٹ ہونے والے مواد کی اہمیت پر بھی زور دیا اور چینل کو مؤثر اور بامقصد بنانے کے لیے طلبہ اور اساتذہ سے مسلسل فیڈبیک لینے کی ہدایت دی۔
جموں کشمیر کے منفرد جغرافیائی اور موسمی حالات، بالخصوص دور افتادہ اضلاع کا ذکر کرتے ہوئے وزیر اعلیٰ نے کہا کہ یہ چینل تنہا علاقوں میں رہنے والے طلبہ کے لیے خاص طور پر فائدہ مند ثابت ہوگا۔
عمرعبداللہ نے کہا’’ہمارے طلبہ اسکول میں تعلیم حاصل کرنے کے بعد گھر بیٹھے بھی ان چینلز کے ذریعے اپنی تعلیم جاری رکھ سکتے ہیں‘‘۔انہوں نے ڈیجیٹل اسکرینز کے ذمہ دارانہ استعمال پر بھی بات کی اور طلبہ کو تلقین کی کہ موبائل آلات کو تعلیمی اور علمی مواد کے لیے استعمال کریں، جبکہ غیر ضروری گیمنگ اور غیر پیداواری سرگرمیوں سے پرہیز کریں۔
مطالعے کی عادت کی اہمیت پر زور دیتے ہوئے وزیر اعلیٰ نے والدین اور اساتذہ سے اپیل کی کہ وہ بچوں میں کتابیں، اخبارات اور رسائل پڑھنے کی عادت ڈالیں۔انہوں نے کہا’’اگر ہم اپنے بچوں کے لیے کتابوں کی دنیا کھول دیں، تو ہم ان کے لیے ایک بالکل نئی دنیا کھول دیتے ہیں‘‘۔
وزیر اعلیٰ نے امید ظاہر کی کہ جے کے ای۔پاتھ شالا جموں و کشمیر میں ایک وسیع ڈیجیٹل تعلیمی نظام کی بنیاد ثابت ہوگا۔ انہوں نے کہا کہ مستقبل میں ہر جماعت کے لیے الگ چینلز متعارف کرائے جا سکتے ہیں تاکہ ہر درجے کے لیے مناسب تعلیمی وقت یقینی بنایا جا سکے۔
عمرعبداللہ نے زور دیتے ہوئے کہا’’ٹیکنالوجی کتنی ہی ترقی کیوں نہ کر لے، جسمانی اساتذہ کبھی متبادل نہیں ہو سکتے‘‘۔انہوں نے تمام متعلقہ فریقوں سے اپیل کی کہ جموں و کشمیر کے بچوں کے روشن مستقبل کے لیے مل کر کام کریں۔
اس سے قبل وزیر تعلیم سکینہ ایتو، وزیر اعلیٰ کے مشیر ناصر اسلم وانی اور چیف سیکریٹری اٹل ڈلو نے بھی خطاب کیا اور جے کے ای۔پاتھ شالا کے آغاز کو جموں و کشمیر کے تعلیمی شعبے کو مضبوط بنانے کی سمت ایک تاریخی اور انقلابی قدم قرار دیا۔