یوتھ حوصلے، تجسس اور تبدیلی لانے کی طاقت کا نام ہے:ایل جی

جموں: لیفٹیننٹ گورنر‘ منوج سنہا نے بدھ کے روز ورچوئل طریقے سے جموں و کشمیر یونین ٹیریٹری کے۵۳ رکنی یوتھ کنٹیجنٹ کو نئی دہلی کے لیے روانہ کیا، جو۲۹ویں نیشنل یوتھ فیسٹیول وِکست بھارت ینگ لیڈرز ڈائیلاگ۲۰۲۶میں شرکت کرے گا۔
نوجوانوں کو بااختیار بنانے اور اتحاد کے فروغ کے مقصد سے ہر سال۱۲جنوری کو سوامی وویکانند کی یومِ پیدائش کے موقع پر نیشنل یوتھ فیسٹیول منعقد کیا جاتا ہے۔
۲۰۲۵میں نیشنل یوتھ فیسٹیول کو ’’وِکست بھارت ینگ لیڈرز ڈائیلاگ‘‘ کی شکل دی گئی، تاکہ وِکست بھارت۲۰۴۷کے وژن سے ہم آہنگی پیدا کی جا سکے۔
وِکست بھارت چیلنج ٹریک اور کلچرل/انوویشن ٹریک کے لیے منتخب کیا گیا یہ کنٹیجنٹ۱۰ سے۱۲جنوری تک بھارت منڈپم، نئی دہلی میں منعقد ہونے والے اس باوقار قومی پروگرام میں جموں و کشمیر کی نمائندگی کرے گا۔
ورچوئل موڈ کے ذریعے شریک نوجوانوں سے خطاب کرتے ہوئے لیفٹیننٹ گورنر نے انہیں اس اہم قومی تقریب کے لیے نیک خواہشات پیش کیں۔
سنہا نے مقامی مقابلوں سے قومی سطح تک پہنچنے پر شرکاء کو مبارکباد دی اور کہا کہ ان کا یہ سفر جموں و کشمیر کے نوجوانوں میں موجود بے پناہ صلاحیتوں کا مظہر ہے۔
لیفٹیننٹ گورنر نے کہا’’یوتھ عمر کا مسئلہ نہیں، بلکہ ایک ذہنیت ہے۔ یہ حوصلے، تجسس اور تبدیلی لانے کی طاقت کا نام ہے۔ مجھے اپنے نوجوانوں کی صلاحیت اور ایک ترقی یافتہ بھارت کی تشکیل کے ان کے عزم پر مکمل یقین ہے۔‘‘
سوامی وویکانند کے مشہور نعرے ’’اُٹھو، جاگو اور اس وقت تک نہ رکو جب تک منزل حاصل نہ ہو جائے‘‘ کا حوالہ دیتے ہوئے لیفٹیننٹ گورنر نے نوجوانوں سے اپیل کی کہ وہ اپنے خوابوں کو اپنی زندگی کا واحد مقصد بنائیں اور راستے میں آنے والے ہر چیلنج کو نظم و ضبط اور صبر کا سبق سمجھیں۔
سنہا نے اس بات پر زور دیا کہ حقیقی قیادت کی پہچان ذاتی کامیابیوں سے نہیں بلکہ دوسروں کے لیے مواقع پیدا کرنے کی صلاحیت سے ہوتی ہے۔
لیفٹیننٹ گورنر نے کہا’’آپ کی سب سے بڑی ذمہ داری سماج اور قوم کے تئیں ہے۔ حقیقی ترقی کا مطلب یہ ہے کہ دوسروں کو آگے بڑھنے کے مواقع فراہم کیے جائیں۔مستقبل کی صلاحیتیں پیدا کریں، کردار سازی پر توجہ دیں اور عمر بھر سیکھنے کے عمل کو اپنائیں۔ دلیر بنیں، بے خوف بنیں، حدود سے آگے سوچیں۔ آپ کا حوصلہ، نظم و ضبط، وضاحت اور عزم، تجربے کے ساتھ مل کر وِکست بھارت کے سفر میں آپ کی رہنمائی کرے گا۔‘‘
اس موقع پر کمشنر/سکریٹری یوتھ سروسز اینڈ اسپورٹس محترمہ یاشا مڈگل، ڈائریکٹر جنرل یوتھ سروسز اینڈ اسپورٹس محترمہ انورا دھا گپتا، سینئر افسران، شریک نوجوان اور کنٹیجنٹ کے ہمراہ آنے والے اہلکار بھی موجود تھے۔