لیفٹیننٹ گورنر کی جموں کشمیر کی جیلوں میں باقاعدہ جانچ اور نگرانی پر زور

جموں کشمیر کے لیفٹیننٹ گورنر منوج سنہا نے ہفتہ کے روز جموں میں واقع لوک بھون میں محکمہ داخلہ کے تحت آنے والے ذیلی محکموں کے اعلیٰ سطحی جائزہ اجلاس کے دوران پورے جموں و کشمیر میں جیلوں کی باقاعدہ جانچ اور کڑی نگرانی کی ہدایت دی، ایک سرکاری ترجمان نے بتایا۔
اجلاس میں مالی سال۲۰۲۵۔۲۰۲۶ کیلئے جیل خانہ جات، پراسیکیوشن، ہوم گارڈز/سی ڈی اور ایس ڈی آر ایف، فائر اینڈ ایمرجنسی سروسز، فرانزک سائنسز لیبارٹری، سینک ویلفیئر اور پبلک سیفٹی ایکٹ (پی ایس اے) کے تحت قائم ایڈوائزری بورڈ کے بجٹ اور اخراجات کی صورتحال پر تفصیلی تبادلہ خیال کیا گیا۔
لیفٹیننٹ گورنر نے جاری اہم منصوبوں کی پیش رفت کا بھی جامع جائزہ لیا، جن میں کٹھوعہ کے مہان پور میں ہائی سکیورٹی جیل کی تعمیر، فرانزک سائنسز لیبارٹری (ایف ایس ایل) جموں میں سائبر ڈویڑن کا قیام، ایف ایس ایل سرینگر میں سائبر ڈویڑن کی اپ گریڈیشن اور جموں و کشمیر کے سرحدی اضلاع میں بنکروں کی تعمیر شامل ہے۔
سنہا نے متعلقہ محکموں کو ہدایت دی کہ ان منصوبوں پر کام کی رفتار تیز کی جائے اور باہمی ہم آہنگی کے ذریعے محکمہ داخلہ کے مختلف شعبوں کو مزید مضبوط بنایا جائے۔
لیفٹیننٹ گورنر نے جیل افسران اور عملے کو حساس بنانے (سینسِٹائزیشن) اور پورے جموں و کشمیر میں جیلوں کی بار بار جانچ اور نگرانی یقینی بنانے کی بھی ہدایت دی۔
اجلاس میں چیف سیکریٹری اٹل ڈولو، ڈائریکٹر جنرل پولیس (جیل خانہ جات) دیپک کمار، پرنسپل سیکریٹری داخلہ چندرکیر بھارتی، پرنسپل سیکریٹری محکمہ خزانہ سنتوش ڈی ویدیہ، لیفٹیننٹ گورنر کے پرنسپل سیکریٹری ڈاکٹر مندیپ کے بھنڈاری، کمانڈنٹ جنرل ہوم گارڈز عبدالغنی میر، ڈائریکٹر فائر اینڈ ایمرجنسی سروسز آلوک کمار، ڈائریکٹر سینک ویلفیئر بریگیڈیئر (ریٹائرڈ) پنکج چِب، ڈائریکٹر فرانزک سائنسز لیبارٹری اوم پرکاش اور دیگر اعلیٰ حکام نے شرکت کی۔