خرابی پائی جانے پر ایئرلائن کے خلاف سخت کارروائی کی جائے گی: کے . رام موہن نائڈو

نئی دہلی، 09 دسمبر (یو این آئی) حکومت نے منگل کے روز واضح طور پر کہا کہ انڈیگو ایئرلائنز کی پروازیں منسوخ ہونے سے مسافروں کو ہونے والی مشکلات کے پیشِ نظر انڈیگو کے خلاف وجہ بتاؤ نوٹس جاری کیا گیا ہے اور اگر خرابی پائی گئی تو ضابطے کے مطابق سخت کارروائی کی جائے گی۔
شہری ہوا بازی کے وزیر کے . رام موہن نائڈو نے لوک سبھا میں کہا کہ انڈیگو ایئرلائنز کی پروازیں معمول پر لانے کے اقدامات کیے جا رہے ہیں اور پیر کے روز 1,800 پروازیں چلائی گئی ہیں۔ حکومت مسافروں کی حفاظت کے تئیں بہت سنجیدہ ہے اور اسی سلسلے میں متعدد اقدامات کیے جا رہے ہیں۔
انہوں نے کہا کہ انڈیگو کی منسوخ شدہ پروازوں کے سبب ہوائی سفر کی قیمتوں میں بے جا اضافہ نہ کرنے کی ہدایت دی گئی ہے ۔ قیمتوں کی حد بھی مقرر کی گئی ہے ۔ منسوخ شدہ پروازوں کی رقم واپس کرنے کے لیے انڈیگو کو واضح ہدایات دی گئی ہیں اور 750 کروڑ روپے واپس بھی کیے جا چکے ہیں۔ مسافروں کا سامان بھی ان کے گھروں تک پہنچانے کی ہدایت دی گئی ہے اور یہ کام آخری مراحل میں ہے ۔
مسٹر نائڈو نے کہا کہ حکومت کی پالیسیوں کی بدولت ملک کا ہوابازی کا شعبہ تیزی سے ترقی کر رہا ہے ۔ دنیا بھر میں سب سے زیادہ ترقی کرنے والا ہوابازی کا شعبہ ہندوستان کا ہی ہے ۔
اس پر اسپیکر اوم برلا نے کہا کہ حزب اختلاف نے وزیر سے بیان طلب کیا تھا اور وزیر نے اپنا بیان دے دیا ہے ۔ انڈیگو بحران کی تحقیقات جاری ہیں اور نوٹس بھی جاری کیا گیا ہے ۔ وزیر نے صورتحال ایوان کے سامنے رکھ دی ہے اس کے باوجود ہنگامہ آرائی اچھی بات نہیں ہے ۔ حزبِ اختلاف کے اراکین پھر بھی خاموش نہ ہوئے اور ایوان سے باہر چلے گئے ۔