گوئل نے برلن میں جرمن صنعت کے سرکردہ افراد اور تحقیقی اداروں کے نمائندوں سے ملاقات کی

نئی دہلی، 24 اکتوبر (یو این آئی) صنعت و تجارت کے مرکزی وزیر پیوش گوئل نے 23 اکتوبر کو برلن میں مختلف پروگراموں میں شرکت کے ساتھ جرمنی کا اپنا 2 روزہ سرکاری دورہ مکمل کیا۔ اس دوران انہوں نے جرمن حکومت کے اعلیٰ عہدیداروں، صنعت کے سرکردہ افراد، تحقیقی اداروں کے نمائندوں اور ہندوستانی برادری کے ارکان سے ملاقات کی۔
مسٹر پیوش گوئل نے جرمن فیڈرل چانسلری میں اقتصادی اور مالیاتی پالیسی کےصلاح کار اور جی 7 / جی 20 شیرپا مسٹر لیون ہولے کے ساتھ دوطرفہ ملاقات کی۔ ا س ملاقات میں دوطرفہ اقتصادی تعاون اور ہندوستان اور جرمنی کے درمیان اقتصادی و سرمایہ کاری کے تعلقات کو مزید مضبوط بنانے کے مواقع پر تبادلہ خیال کیا گیا ۔
وزیر موصوف نے سی ای او، سیمنز ہیلتھینیرز اے جی ،مسٹر برنڈ مونٹاگ ، برٹلس مین کے ایگزیکٹو بورڈ کے رکن اور برٹلس مین انویسٹمنٹس کے سی ای او مسٹر کارسٹن کوسفیلڈ اور ووکس ویگن اے جی کے سی ایف او اور اسکوڈا آٹو کے سی ای او مسٹر ہولگر پیٹرز سے الگ الگ ملاقاتیں کیں۔ ان ملاقاتوں میں دونوں ممالک کے درمیان کاروباری شراکت داری، سرمایہ کاری اور صنعتی تعاون کو وسعت دینے کے مواقع تلاش کیے گئے۔
مسٹرگوئل نے جدید صنعتی ٹیکنالوجیز اور اختراع میں تعاون پر تبادلہ خیال کرنے کے لیے ممتاز جرمن صنعتی تحقیقی اداروں کے سربراہان کے ساتھ ایک گول میز کانفرنس میں بھی شرکت کی۔ اس کے علاوہ، ساتھ آئے ہوئے ہندوستانی کاروباری وفد کے ارکان نے دوطرفہ کاروباری تعاون کے مواقع تلاش کرنے کے لیے جرمن صنعت کے نمائندوں اور سیکٹرل ایسوسی ایشنز کے ساتھ مختلف شعبہ جاتی گول میز کانفرنسوں میں حصہ لیا۔
مسٹر گوئل نے برلن میں مقیم ہندوستانی تارکین وطن کے ارکان سے بھی بات چیت کی اور میڈیا سے خطاب کیا۔
تحقیق اور اختراع کے ایکو سسٹم کے ساتھ اپنی وابستگی کے حصے کے طور پر، مسٹر گوئل نے جرمنی میں موجود ہندوستانی سائنس اور ٹیکنالوجی کے محققین اور طلبہ سے ملاقات کی۔ انہوں نے منتخب فرون ہوفر انسٹی ٹیوٹس کے سربراہان کے ساتھ ایک گول میز کانفرنس بھی کی، جس میں مائیکرو الیکٹرانکس، پاور الیکٹرانکس، لاجسٹکس، اسمارٹ مینوفیکچرنگ، صنعتی اختراع اور بیٹری ٹیکنالوجیز جیسے شعبے شامل تھے۔ گفتگو میں ہندوستان اور جرمنی کے درمیان تحقیقی تعاون اور صنعت و تعلیمی اداروں کی شراکت داری کو مضبوط بنانے کے راستے تلاش کیے گئے۔
ان پروگراموں نے ہندوستان-جرمنی اسٹریٹجک شراکت داری کے بڑھتے ہوئے دائرے کو اجاگر کیا، خاص طور پر تجارت، سرمایہ کاری، جدید مینوفیکچرنگ، سائنس اور ٹیکنالوجی، تحقیق اور صنعتی تعاون کے شعبوں میں۔