کانگریس نے پانچ ریاستوں میں ہونے والے انتخابات کے لیے وار روم کے سربراہ مقرر کیے

نئی دہلی، 24 اکتوبر (یو این آئی) کانگریس نے اگلے سال ہونے والے اسمبلی انتخابات کے پیش نظر اتر پردیش، پنجاب، گوا، منی پور اور اتراکھنڈ میں انتخابی وار روم کے سربراہ مقرر کیے ہیں۔
کانگریس کے جنرل سکریٹری کے سی وینوگوپال نے ہفتے کے روز یہ اطلاع دیتے ہوئے بتایا کہ پارٹی صدر ملکارجن کھرگے نے ان تقرریوں کو منظوری دے دی ہے اور تمام عہدیداروں سے کہا ہے کہ وہ فوری طور پر اپنا کام شروع کر دیں۔
انہوں نے بتایا کہ اتر پردیش میں سچن یادو، پنجاب میں کنن گوپی ناتھن، گوا میں امروز خان، منی پور میں بسورنجن موہنتی اور اتراکھنڈ میں کرشن ستروڈ کو انتخابی وار روم کا سربراہ مقرر کیا گیا ہے۔
قابل ذکر ہے کہ اتر پردیش وار روم کے لیے مقرر کیے گئے سچن یادو مدھیہ پردیش میں کانگریس کے رکن اسمبلی اور سابق وزیر ہیں۔ پنجاب اسمبلی انتخابات کے وار روم کے سربراہ مقرر کیے گئے کنن گوپی ناتھن انڈین ایڈمنسٹریٹو سروس (آئی اے ایس) کے سابق افسر ہیں اور انہوں نے 2019 میں اپنی ملازمت سے استعفیٰ دے دیا تھا۔