برکس پارلیمانی فورم کے اجلاس میں ایران شرکت نہیں کرے گا

نئی دہلی، 24 اکتوبر (یو این آئی) ایران کی پارلیمنٹ کے اسپیکر ڈاکٹر محمد باقر قالیباف بعض غیر متوقع حالات کے باعث نئی دہلی میں ہونے والے 12ویں برکس پارلیمانی فورم کے اجلاس میں شرکت نہیں کر سکیں گے۔ ہندوستان میں ایران کے سفارت خانے نے ہفتے کے روز یہ اطلاع دی۔
سفارت خانے کی جانب سے جاری بیان میں کہا گیا ہے کہ مسٹر قالیباف برکس کے رکن ممالک کی پارلیمانوں کے اسپیکروں کے اجلاس میں شرکت نہیں کر پائیں گے۔ تاہم، ایران کا پارلیمانی وفد اجلاس میں شرکت کرے گا۔
بیان کے مطابق، برکس کے رکن کی حیثیت سے ایران نے اس گروپ کی چوٹی کانفرنسوں اور اجلاسوں میں اعلیٰ ترین سطح پر فعال اور مؤثر شرکت کے اپنے عزم کا اعادہ کیا ہے۔
ایرانی وفد برکس کے رکن ممالک کے وفود کے ساتھ بات چیت اور تبادلۂ خیال جاری رکھے گا۔ اس کا مقصد خاص طور پر پارلیمانی تعلقات اور تعاون کے شعبے میں دوطرفہ اور کثیرجہتی تعاون کو وسعت دینا اور اسے مضبوط بنانا ہے۔
سفارت خانے نے اجلاس کی میزبانی کے لیے حکومتِ ہند کی جانب سے کیے گئے انتظامات اور مہمان نوازی پر اظہارِ تشکر کیا۔ اس نے برکس کے رکن ممالک کی پارلیمانوں کے اسپیکروں کے اجلاس کی کامیابی کے لیے نیک خواہشات کا اظہار کرتے ہوئے امید ظاہر کی کہ اس سے رکن ممالک کے درمیان تعاون اور شراکت داری کو مضبوط بنانے کی سمت میں مثبت نتائج سامنے آئیں گے۔