پلوامہ میں تلاش کے دوران علیحدگی پسند پوسٹر اور ممنوعہ لٹریچر برآمد

سرینگر/۶ دسمبر
پلوامہ میں تلاشِی کارروائی کے دوران پولیس نے علیحدگی پسند تنظیم کے پوسٹر اور بعض ممنوعہ لٹریچر سمیت قابلِ اعتراض مواد برآمد کیا ہے۔
ایک پولیس ترجمان کے مطابق، این آئی اے کورٹ پلوامہ کی جانب سے یو اے پی اے کے تحت درج مقدمے میں جاری کیے گئے سرچ وارنٹ کی بنیاد پر پولیس نے لِتر پلوامہ کے رہائشی محمد عامر راتھر کی ملکیتی ایک دکان پر تلاشی کارروائی انجام دی۔
ترجمان نے بتایا کہ تلاشی مجسٹریٹ اور آزاد گواہوں کی موجودگی میں عمل میں لائی گئی، تاکہ کارروائی میں مکمل شفافیت اور قانونی تقاضوں کی پابندی یقینی بنائی جا سکے۔
تلاشی کے دوران پولیس نے قابلِ اعتراض مواد، بشمول جموں و کشمیر ڈیموکریٹک فریڈم پارٹی ‘ جس کے سربراہ نظربند شبیر شاہ ہیں‘ کے پوسٹر اور ممنوعہ کتابیں برآمد کیں۔
ترجمان کے مطابق، ضبط شدہ تمام مواد کو تفصیلی جانچ کے لیے تحویل میں لے لیا گیا ہے۔
انہوں نے مزید کہا کہ معاملے کی تہہ تک پہنچنے اور ضبط شدہ مواد سے جڑے کسی بھی ممکنہ رابطے یا وسیع تر پہلوؤں کی جانچ کے لیے تحقیقات جاری ہیں۔ (ایجنسیاں)