ڈوڈہ میں مبینہ مارپیٹ کی ویڈیو وائرل‘ اے ایس آئی کے خلاف کیس درج

جموں/۶دسمبر
جموں کے ضلع ڈوڈہ میں اسسٹنٹ سب انسپکٹر کے خلاف اس وقت کارروائی عمل میں لائی گئی جب سوشل میڈیا پر ایک ویڈیو وائرل ہوئی جس میں مبینہ طور پر اسے ایک موٹر سائیکل سوار کو سرِ عام تشدد کا نشانہ بناتے ہوئے دیکھا جا سکتا ہے ۔
عوامی مقامات پر پیش آنے والے اس واقعے نے مقامی سطح پر شدید ردعمل کو جنم دیا۔
پولیس کے مطابق ۳دسمبر کو عنزر مجید ملک نامی شہری نے ڈی ایچ ڈوڈہ پولیس پوسٹ میں تحریری شکایت درج کرائی، جس میں الزام لگایا گیا کہ اے ایس آئی غلام علی ساکن صدیق آباد نے اسے بلاجواز روکا اور مارپیٹ کی۔ شکایت موصول ہوتے ہی پولیس نے فوری کارروائی کرتے ہوئے متعلقہ دفعات کے تحت ڈوڈہ پولیس اسٹیشن میں ایف آئی آر درج کی۔
پولیس بیان میں کہا گیا ہے کہ فورس کے اندر کسی بھی قسم کی بدسلوکی یا اختیارات کے غلط استعمال کے خلاف ہماری زیرو ٹالرینس پالیسی ہے‘جس کے تحت قانونی کارروائی فوری شروع کر دی گئی ہے ۔
پولیس نے مزید بتایا کہ کیس کی تفتیش جاری ہے اور حقائق سامنے آنے کے بعد قانون کے مطابق کارروائی عمل میں لائی جائے گی۔