سرینگر/۱۵ نومبر
وزیر اعلیٰ عمر عبداللہ نے ہفتہ کو کہا کہ نوگام کے حادثاتی دھماکے میں متاثر ہونے والوں کو حکومت ہر ممکن مدد فراہم کرے گی۔
وزیر اعلیٰ نے صحت کی وزیر سکینہ اتو کو ہدایت دی ہے کہ زخمیوں کے بہترین علاج کو یقینی بنایا جائے، اور یہ بھی یقین دہانی کرائی کہ حادثاتی دھماکے میں جن ڈھانچوں کو نقصان پہنچا ہے انہیں باقاعدہ معاوضہ دیا جائے گا۔
سوشل میڈیا پلیٹ فارم ایکس (سابقہ ٹوئٹر) پر دفترِ وزیر اعلیٰ جموں و کشمیر نے لکھا:’’وزیر اعلیٰ نے یقین دلایا ہے کہ حکومت المناک نوگام پولیس اسٹیشن دھماکے میں جان گنوانے والے افراد کے لواحقین کے ساتھ پوری مضبوطی کے ساتھ کھڑی ہے اور انہیں ہر ممکن تعاون فراہم کرے گی۔‘‘
مزید کہا گیا ’’انہوں نے صحت کی وزیر سکینہ ایتو کو زخمیوں کے بہترین علاج کی ہدایت دی ہے اور یقین دہانی کرائی ہے کہ نقصان پہنچنے والی عمارتوں کو مکمل معاوضہ دیا جائے گا۔‘‘
واضح رہے کہ گزشتہ رات نوگام پولیس اسٹیشن میں اس وقت دھماکہ ہوا تھا جب ایک حالیہ کیس میں ضبط شدہ بڑی مقدار میں دھماکہ خیز مواد کا فارنسک نمونہ لیا جا رہا تھا۔ اس حادثے میں نو افراد جاں بحق اور ۳۰ سے زائد زخمی ہوئے۔
اس سے پہلے عمر عبداللہ اور سابق وزیر اعلیٰ محبوبہ مفتی نے نوگام پولیس اسٹیشن میں ہونے والے حادثاتی دھماکے پر گہرے رنج و غم کا اظہار کیا ہے ۔
وزیر اعلیٰ کے دفتر کے ’ایکس‘ہینڈل پر ایک پوسٹ میں کہا’’وزیر اعلیٰ نے نوگام پولیس اسٹیشن میں ہونے والے المناک حادثاتی دھماکے پر گہرے دکھ اور رنج کا اظہار کیا جس میں قیمتی جانوں کا زیاں اور متعدد زخمی ہوئے ہیں‘‘۔
عمرعبداللہ نے سوگوار کنبوں کے ساتھ ہمدردی کا اظہار کیا اور زخمیوں کی جلد صحتیابی کے لئے دعا کی۔
سابق وزیر اعلیٰ محبوبہ مفتی نے بھی اس واقعے پر دکھ کا اظہار کیا۔
محبوبہ نے ’ایکس‘پر اپنے ایک پوسٹ میں کہا’’گام پولیس سٹیشن میں ہونے والے المناک حادثاتی دھماکے سے گہرا دکھ ہوا جس میں۹قیمتی جانیں چلی گئیں اور متعدد زخمی ہوئے ‘‘۔
سابق وزیر اعلیٰ کا کہنا تھا’’یہ دل دہلا دینے والا واقعہ ان خطرات اور مشکل حالات کو ظاہر کرتا ہے جن میں ہمارے پولیس اہلکار لوگوں کو محفوظ رکھنے کے لیے خدمات انجام دیتے ہیں‘‘۔
محبوبہ نے سوگوار خاندانوں کے ساتھ تعزیت کا اظہار کیا اور زخمیوں کی جلد صحتیابی کیلئے دعا کی۔
(ندائے مشرق خبر
