بارہمولہ میں قوم دشمن عناصر کیخلاف کارروائیوں میں تیزی

سرینگر/۱۵ نومبر
بارہمولہ میں جموں کشمیر پولیس نے ضلع بھر میں ہم آہنگ حفاظتی کارروائیاں انجام دے کر امن و امان کو مضبوط کرنے اور مخالفِ قوم سرگرمیوں سے جڑے عناصر کے خلاف گھیرا تنگ کر دیا ہے۔
ایک پولیس اہلکار نے بتایا کہ کارروائی کے دوران تخریبی پس منظر رکھنے والے تین افراد کو طلب کرکے انسدادی قانون کے تحت پابندِ ضمانت کیا گیا۔ اس کے علاوہ اوور گراؤنڈ ورکرز سے وابستہ سات مقامات کی تلاشی لی گئی اور سات افراد کو بھی پابندِ ضمانت کیا گیا۔
اہلکار نے بتایا کہ یو اے پی اے کے تحت مقدمات کا سامنا کرنے والے دو افراد‘جو اس وقت ضمانت پر ہیں‘سے پوچھ گچھ کی گئی جن میں سے ایک کو انسدادی دفعات کے تحت پابند کیا گیا۔
مزید یہ کہ ضمانت پر موجود سات یو اے پی اے ملزمان کی ضمانت منسوخی کے لیے کارروائی شروع کی گئی، اور دو متعلقہ کیس عدالت میں جمع کرائے گئے۔ حساس علاقوں میں ۲۹ تلاشی کارروائیاں کی گئیں تاکہ نگرانی اور علاقائی برتری کو مضبوط کیا جا سکے۔
اہلکار نے مزید بتایا کہ۲۴۴ گاڑیوں کی چیکنگ کی گئی تاکہ نقل و حرکت کی نگرانی اور مستند شناخت کی تصدیق ہو سکے، جبکہ ۱۸ سم فروشوں کی جانچ پڑتال بھی کی گئی۔انہوں نے کہا کہ یہ تمام اقدامات ممکنہ خطرات کو روکنے، قانون کی سختی سے عملداری کو یقینی بنانے اور ضلع بھر میں امن کے ماحول کو برقرار رکھنے کے لیے اٹھائے گئے ہیں۔
پولیس نے واضح کیا کہ وہ عوامی نظم کو برقرار رکھنے کے لیے پْرعزم ہے اور حالات کو مستحکم رکھنے کے لیے ایسی انسدادی کارروائیاں جاری رکھی جائیں گی۔ایجنسیز