جموں/۶نومبر
منشیات کے خلاف کارروائیوں کو جاری رکھتے ہوئے جموں پولیس نے دو بین ریاستی خاتون منشیات فروشوں کو گرفتار کرکے ان کی تحویل سے بھاری مقدار میں خشخاش بھوسہ جیسا ممنوعہ مواد بر آمد کیا ہے ۔
ایک پولیس ترجمان نے اپنے ایک بیان میں کہا کہ پولیس اسٹیشن آر ایس پورہ کی ایک ٹیم نے کوٹلی شاہ دولہ علاقے میں شیو مندر کے نزیدک دو خاتون منشیات فروشوں کو دھر لیا۔
ترجمان نے کہا کہ تلاشی کے دوران ان کی تحویل سے ۱۳کلو۷۷۸گرام خشخاش بھوسہ بر آمد کیا گیا جس کے بعد دونوں کو بر سرموقع ہی گرفتار کیا گیا۔
گرفتار شدگان کی شناخت سمرن پریت کور دختر سکھ دیو سنگھ اور جاسمین کور دختر نرمل سنگھ ساکنان بیاس امرتسر پنجاب کے طور پر کی گئی ہے ۔
پولیس ترجمان نے بتایا کہ اس سلسلے میں پولیس اسٹیشن آر ایس پورہ میں این ڈی پی ایس ایکٹ کے متعلقہ دفعات کے تحت زیر ایف آئی آر نمبر۲۰۲۵/۲۱۶؍ایک مقدمہ درج کیا گیا اور مزید تحقیقات شروع کی گئی۔
ترجمان نے کہا کہ جموں پولیس منشیات کے ناسور کو جڑ سے اکھاڑنے اور نوجوان نسل کو نشے کی لعنت سے محفوظ رکھنے کیلئے پر عزم ہے ۔
ادھراودھم پور پولیس نے ایک منشیات فروش کی۱۲لاکھ روپے مالیت کی منقولہ جائیداد کو این ڈی پی ایس ایکٹ کے تحت ضبط کر دیا۔
ایک پولیس ترجمان نے اپنے ایک بیان میں کہا کہ اودھم پور پولیس نے ایک منشیات فروش کی۱۲لاکھ روپیے مالیت کی گاڑی این ڈی پی ایس ایکٹ کے تحت ضبط کر دی۔
ترجمان نے کہا کہ پولیس اسٹیشن ریہام بل میں این ڈی پی ایس ایکٹ کی متعلقہ دفعات کے تحت درج ایک ایف آئی آر زیر نمبر۲۰۲۵/۱۱۴کی تحقیقات کے دوران یہ بات سامنے آئی کہ ملزم عبد الواحد ولد عبدالرشید ساکن گرنائی اودھم پور نے ایک گاڑی منشیات کے کاروبار سے حاصل شدہ رقم سے خریدی تھی۔
ان کا کہنا ہے کہ اس کے مطابق مذکورہ گاڑی کو این ڈی پی ایس ایکٹ کی دفعہ ۶۸(ایف) کے تحت مزید قانونی کارروائی کے لئے ضبط کیا گیا۔
پولیس ترجمان نے بتایا کہ اودھم پور پولیس نے رواں سال کے دوران این ڈی پی ایس ایکٹ سے متعلق مقدمات میں مجموعی طور پر۶۲ء۱۰کروڑ روپے مالیت کی جائیدادیں ضبط کی ہیں۔انہوں نے کہا کہ یہ کارروائیاں اودھم پور پولیس کے منشیات سے پاک ضلع بنانے کے عزم کو ظاہر کرتی ہیں۔یو این آئی
