روہن جیٹلی اور متھن منہاس کی وزیرِ اعلیٰ عمر عبداللہ سے ملاقات

سرینگر/۲۸؍اکتوبر
جموں کشمیر میں کرکٹ کے بنیادی ڈھانچے کو عالمی معیار کے مطابق فروغ دینے کے لیے بی سی سی آئی کے اعلیٰ عہدیداروں نے وزیر اعلیٰ عمر عبداللہ سے اہم ملاقات کی۔
بی سی سی آئی کی انفراسٹرکچر کمیٹی کے چیئرمین روہن جیٹلی اور صدر متھن منہاس نے منگل کے روز عمر عبداللہ سے ملاقات کرتے ہوئے ریاست میں کرکٹ کے فروغ کے لیے ایک جامع روڈ میپ تیار کرنے پر تبادلہ خیال کیا۔
وزیر اعلیٰ کے دفتر کے ذرائع کے مطابق، ملاقات کے دوران موجودہ کرکٹ سہولیات کو بہتر بنانے ، نئے اسٹیڈیمز کے قیام اور نوجوان کھلاڑیوں کی تربیت کے لیے مضبوط نظام قائم کرنے جیسے امور پر تفصیلی گفتگو ہوئی۔
بی سی سی آئی کے وفد نے جموں و کشمیر کی حکومت کو مکمل تعاون کا یقین دلاتے ہوئے کہا کہ وادی اور جموں میں جدید تربیتی مراکز، معیاری پچز اور بین الاقوامی سہولیات فراہم کی جائیں گی۔ اس سلسلے میں جموں اور سری نگر کے اہم میدانوں کو جدید خطوط پر استوار کرنے کی منصوبہ بندی جاری ہے ۔
وزیرِ اعلیٰ عمر عبداللہ نے بی سی سی آئی کی اس پہل کا خیرمقدم کرتے ہوئے کہا کہ نوجوانوں کو کھیلوں سے جوڑنا ریاستی ترقی اور سماجی ہم آہنگی کے لیے نہایت اہم ہے ۔ انہوں نے اس عزم کا اظہار کیا کہ جموں و کشمیر حکومت کھیلوں کے فروغ کے ہر اقدام میں بی سی سی آئی کے ساتھ مل کر کام کرے گی۔
(ڈی آئی پی آر)