محکمہ صحت میں۵۲۵۱؍اسامیاں خالی‘حکومت کی تفصیلی وضاحت

سرینگر/۲۸؍اکتوبر
جموں کشمیر اسمبلی میں منگل کے روز محکمہ صحت میں خالی اسامیوں کا معاملہ اٹھایا گیا، جس کے دوران حکومت نے انکشاف کیا کہ ریاست بھر میں ڈاکٹروں اور پیرا میڈیکل عملے کی۵ہزار۲۵۱اسامیاں فی الوقت خالی ہیں۔
یہ سوال پیپلز ڈیموکریٹک پارٹی (پی ڈی پی) کے رکن اسمبلی میر محمد فیاض نے کیا، جنہوں نے محکمہ صحت میں خالی اسامیوں کی کل تعداد، بھرتیوں کے لیے مقررہ ٹائم لائن اور ضلع کپواڑہ میں عملے کی قلت کے بارے میں تفصیلات طلب کیں۔
حکومت کی جانب سے دیے گئے تحریری جواب کے مطابق، محکمہ صحت میں کل ۵ہزار۲۵۱؍اسامیاں منظور شدہ ہیں، جن میں سے۱۶۳۵گیزٹڈ (ڈاکٹرز( کی اور ۳۶۱۶نان گیزٹڈ (پیرا میڈیکل عملہ( کی ہیں۔ ان میں سے کئی سو اسامیاں تاحال خالی ہیں۔
جواب میں بتایا گیا کہ محکمہ صحت نے کل۲۹۸۷خالی اسامیوں کو جموں و کشمیر پبلک سروس کمیشن اور سروس سلیکشن بورڈ کو مشتہر کرنے کیلئے فنانس ڈیپارٹمنٹ کو بھیج دیا ہے ۔
مزید کہا گیا کہ ضلع کپواڑہ سمیت دیگر اضلاع میں پیرا میڈیکل اسٹاف کی قلت کو پورا کرنے کے لیے محکمہ نے ’اکیڈمک ارینجمنٹ‘کی بنیاد پر عارضی تقرریاں کی ہیں تاکہ عوامی خدمات متاثر نہ ہوں۔
جواب میں یہ بھی کہا گیا’’گیزٹڈ پوسٹس چونکہ ڈویژنل لیول کی ہیں، لہٰذا انہیں مرحلہ وار طریقے سے جموں و کشمیر پبلک سروس کمیشن کے ذریعے بھرا جا رہا ہے ‘‘۔
محکمہ صحت نے مزید کہا کہ حکومت خالی اسامیوں کو جلد از جلد پُر کرنے کے لیے پُرعزم ہے تاکہ اسپتالوں اور طبی مراکز میں مریضوں کو بہتر سہولیات فراہم کی جا سکیں۔
اسمبلی میں ارکان نے اس بات پر تشویش ظاہر کی کہ صحت کے شعبے میں عملے کی کمی نے خاص طور پر دور دراز علاقوں میں طبی خدمات کو شدید متاثر کیا ہے ۔ انہوں نے حکومت سے مطالبہ کیا کہ بھرتی کے عمل کو فوری طور پر مکمل کیا جائے ۔
ایجنسیز