تین ماہ سے مفرور پٹواری گرفتار:کرائم برانچ کشمیر

سرینگر/۲۵؍اکتوبر
کرائم برانچ کشمیر کی اقتصادی جرائم ونگ (ای او وی) نے بدعنوانی اور دھوکہ دہی کے ایک مقدمے کے سلسلے میں ایک سابق پٹواری کو گرفتار کیا ہے جو گذشتہ۳مہینوں سے گرفتاری سے بچ رہا تھا۔
ونگ کے ایک ترجمان نے اپنے ایک بیان میں کہا کہ کرائم برانچ کشمیر نے عاشق علی ولد غلام رسول خان ساکن پانر جاگیر حال حول سری نگر کو گرفتار کیا ہے جو بالہامہ میں بطور پٹواری تعینات تھا۔
ترجمان نے کہا کہ ملزم پی آر سی اور انسداد بدعنوانی ایکٹ کی کی متعلقہ دفعات کے تحت درج مقدمہ زیر ایف آئی آر نمبر۲۰۲۵/۱۴میں مطلوب تھا۔
ان کا کہنا ہے کہ یہ مقدمہ بد عنوانی، دھوکہ دہی اور جعلی انتقالات اراضی اور ریونیو ریکارڈ میں غلط اندراجات سے متعلق ہے ۔
ترجمان نے بتایا کہ مکمل اور ٹھوس شواہد کی بنیاد پر۹جولائی۲۰۲۵کو۶ملزموں کے خلاف ایک مقدمہ درج کیا گیا تھا جن میں ایک تحصیلدار بھی شامل تھا۔انہوں نے کہا کہ ان ملزموں میں سے۵پہلے ہی گرفتار کئے جا چکے ہیں۔
ان کا کہنا ہے کہ عاشق علی کیس کے اندراج کے بعد سے گرفتاری سے بچنے کی کوشش کر رہا تھا اور مخصوص خفیہ اطلاع ملنے پر اقتصادی جرائم ونگ کی ایک ٹیم نے کارروائی کرتے ہوئے ملزم کو کامیابی سے گرفتار کر لیا۔
ترجمان نے بتایا کہ ملزم کی ضمانت کی درخواست معزز عدالت نے پہلے ہی مسترد کر دی ہے ۔انہوں نے کہا کہ کرائم برانچ عوامی انتظامیہ میں شفافیت اور احتساب کے فروغ کیلئے پر عزم ہے ۔ایجنسیز