بیٹے کی موت کا صدمہ ‘باپ حرکت قلب بند ہونے سے فوت ہو گیا

بانہال/۱۴؍ اکتوبر
منگل کی صبح بانہال کے تیتر علاقے میں اس وقت کہرام مچ گیا جب ایک دل دہلا دینے والے سانحے میں باپ اور اس کا کمسن بیٹا زندگی کی بازی ہار گئے۔
سب ڈسٹرکٹ اسپتال (ایس ڈی ایچ) بانہال کے ایک عہدیدار محمد اختر کے مطابق، شبیر احمد گنائی (۴۵) ولد محمد اکبر گنائی اور ان کا۱۴ سالہ بیٹا ساحل احمد، دونوں ساکن تیتر بانہال، صبح تقریباً ۴۵:۶بجے اسپتال لائے گئے تو وہ مردہ پائے گئے۔
اطلاعات کے مطابق، کمسن لڑکا جو کچھ عرصے سے بیمار تھا، اچانک اسپتال لے جاتے وقت راستے میں بے ہوش ہو کر گر گیا۔ یہ منظر دیکھ کر والد پر صدمے کا شدید اثر ہوا اور انہیں دل کا دورہ پڑا، جس کے نتیجے میں وہ بھی موقع پر ہی چل بسے۔
اس افسوسناک واقعے نے پورے تیتر بانہال علاقے کو غم و اندوہ میں ڈوبا دیا ہے۔ مقامی لوگوں کے مطابق، یہ گاؤں میں پیش آنے والے حالیہ برسوں کے سب سے دردناک سانحوں میں سے ایک ہے۔
علاقہ مکینوں نے دونوں باپ بیٹے کی ناگہانی موت پر گہرے دکھ اور افسوس کا اظہار کرتے ہوئے لواحقین کے ساتھ ہمدردی ظاہر کی ہے ۔