ویشنو نے نئی دہلی اسٹیشن پر ہجوم کے انتظام کی تیاریوں کا لیا جائزہ

نئی دہلی، 11 اکتوبر (یو این آئی) ریلوے کے وزیر اشونی ویشنو نے دیوالی اور چھٹھ کے دوران مسافروں کی بھیڑ کو سنبھالنے کی تیاریوں کا جائزہ لینے کے لیے ہفتہ کو نئی دہلی ریلوے اسٹیشن کا دورہ کیا۔ انہوں نے افسران سے بات کی اور صورتحال کا جائزہ لیا۔
اسٹیشن پر ہولڈنگ ایریا کا معائنہ کرنے کے بعد مسٹر ویشنو نے صحافیوں کو بتایا ”نئی دہلی اسٹیشن پر مسافروں کی اچانک تعداد میں اضافہ ہوتا ہے ۔ اس کے پیش نظر دو سال قبل ایک عارضی ہولڈنگ ایریا کے ساتھ ایک تجربہ کیا گیا تھا۔ اس سے آنے والے مسافروں کو کافی فائدہ ہوا تھا۔ اب ایک مستقل علاقہ اور مسافروں کی سہولت کا مرکز بنایا گیا ہے ۔ اس سے خاص طور پر بغیر ٹکٹ آنے والے مسافروں کو سہولت ملے گی۔”
انہوں نے وضاحت کی کہ اندر کے تمام ٹکٹ کاؤنٹرز کو تبدیل کیا جا رہا ہے … آمد پر، مسافروں کو خوش آئند ماحول، بیٹھنے کی ایک بڑی جگہ اور بڑی تعداد میں بیت الخلاء ملے گا۔ یہ نئی دہلی اسٹیشن کے لیے ایک مستقل سہولت ہے ۔ اسی طرح کا نظام ملک بھر کے 76 اسٹیشنوں پر لاگو کیا جا رہا ہے تاکہ پلیٹ فارم پر مسافروں کا ہجوم کم کیا جا سکے ۔ اس نظام کو نئی سطح پر لانے کی ہر ممکن کوشش کی جا رہی ہے ۔ انہوں نے کہا ”چھٹھ اور دیوالی جیسے بڑے تہواروں کے دوران اچانک بھیڑ میں اضافہ ہوجاتا ہے ۔ اس بھیڑ کے دوران اس پورے نظام کی جانچ کی جائے گی اور حاصل کردہ تجربے کی بنیاد پر مستقبل میں دیگر اسٹیشنوں پر بھی اسی طرح کے نظام کو نافذ کیا جائے گا۔”
میٹا (فیس بک) کے ذریعہ سماج وادی پارٹی کے صدر اور ایم پی اکھلیش یادو کے پروفائل کو معطل کرنے (اب منسوخ) کے بارے میں انہوں نے کہا”یہ کارروائی فیس بک کی طرف سے کی گئی ہے ، حکومت کا اس میں کوئی رول نہیں ہے ۔ ان کے اکاؤنٹ سے ایک توہین آمیز پوسٹ کی گئی تھی، جس کی وجہ سے فیس بک نے اپنی پالیسیوں کے مطابق یہ فیصلہ کیا ہے ۔”یو این آئی۔ این یو۔