سونیا گاندھی کا سابق آئی پی ایس افسر پورن کمار کی اہلیہ کے نام تعزیتی پیغام

نئی دہلی، 11 اکتوبر (یو این آئی) کانگریس پارلیمانی پارٹی کی سربراہ سونیا گاندھی نے ہریانہ کے سابق آئی پی ایس افسر وائی۔ پورن کمار کی اہلیہ اور آئی اے ایس افسر امنیت پی۔ کمار کو ایک تعزیتی خط لکھ کر دکھ کی اس گھڑی میں ان کے ساتھ ہمدردی کا اظہار کیا ہے ۔
کانگریس کی سابق صدر نے کہا کہ” یہ ایک افسوسناک اور دل دہلا دینے والا واقعہ ہے ۔ انہوں نے لکھا کہ مسٹر پورن کمار نے سماجی انصاف کے تقاضوں پر پورا اترنے کے اپنے فرض کو بخوبی نبھایا۔ ان کا کام ہمیں یہ یاد دلاتا ہے کہ ہمارے ملک میں ایمانداری اور فرض شناسی کی قدریں آج بھی برقرار ہیں۔”
محترمہ گاندھی نے اپنے خط میں لکھا کہ ”آپ کے شوہر اور سینئر آئی پی ایس افسر شری وائی۔ پورن کمار کی المناک موت کی خبر انتہائی تکلیف دہ اور دل دہلا دینے والی ہے ۔ اس مشکل گھڑی میں ،میری اور کانگریس پارلیمانی پارٹی کی جانب سے آپ اور آپ کے اہلِ خانہ سے دلی تعزیت کا اظہار ہے ۔”
انہوں نے مزید لکھا کہ ”مسٹر وائی۔ پورن کمار کا انتقال ہمیں یہ یاد دلاتا ہے کہ ہمارے ملک میں آج بھی ایمانداری اور فرض شناسی کے اصول سب سے بلند ہیں۔ انہوں نے ایک اعلیٰ افسر ہوتے ہوئے بھی سماجی انصاف کی کسوٹی پر کھرا اترنے کی شاندار مثال قائم کی۔ دکھ کی اس گھڑی میں، میں اور ملک کے کروڑوں شہری آپ کے ساتھ ہیں۔ میں پرارتھنا کرتی ہوں کہ بھگوان آپ کو اس کٹھن وقت میں صبر، حوصلہ اور طاقت عطا کرے ۔”