اتراکھنڈ: پیپر لیک ہونے کے بعد اب کمیشن نے امتحان منسوخ کیا، تین مہینے میں دوبارہ ہوگا امتحان

دہرادون، 11 اکتوبر (یو این آئی)اتراکھنڈ سب آرڈینیٹ سروس سلیکشن کمیشن (یو کے ایس ایس ایس سی) نے 21 ستمبر کو منعقدہ گریجویٹ سطح کے تحریری امتحان کو ہفتے کے روز منسوخ کر دیا۔ کمیشن کے سکریٹری ڈاکٹر شیو برنوال نے امتحان منسوخی کا حکم جاری کرتے ہوئے کہا کہ یہ امتحان تین ماہ کے اندر دوبارہ کرایا جائے گا۔
آج صبح ہی امتحان کی جانچ کے لیے تشکیل دیے گئے ایک رکنی عدالتی کمیشن کے چیئرمین جسٹس یو سی دھِیانی نے اپنی رپورٹ وزیراعلیٰ کو سونپی۔ اس سے قبل جمعہ کے روز بی جے پی ارکانِ اسمبلی نے وزیراعلیٰ سے ملاقات کر کے امتحان منسوخ کرنے کا مطالبہ کیا تھا۔ اس سفارش کے بعد کمیشن نے امتحان منسوخ کرنے کا فیصلہ کیا۔
ہفتے کے روز جاری حکم میں کہا گیا کہ اتراکھنڈ سب آرڈینیٹ سروس سلیکشن کمیشن نے 9 اپریل 2025 کو گریجویٹ سطح کے عہدوں کے لیے جاری اشتہار کی بنیاد پر 21 ستمبر کو ریاست کے تمام اضلاع میں امتحان کا انعقاد کیا تھا۔ امتحان کے اختتام کے بعد تقریباً 1:30 بجے سوشل میڈیا پر کچھ سوالات کے اسکرین شارٹس وائرل ہو گئے ، جس کی اطلاع ملتے ہی کمیشن نے معاملہ ایس ایس پی دہرادون کو کارروائی کے لیے بھیجا۔
بعد ازاں 27 ستمبر 2025 کو حکومت نے معاملے کی جانچ کے لیے کمیشن آف انکوائری ایکٹ 1952 کے تحت ریٹائرڈ جسٹس یو سی دھِیانی کی سربراہی میں ایک رکنی عدالتی تحقیقاتی کمیشن تشکیل دیا۔
کمیشن کی جانب سے جاری پریس نوٹ میں کہا گیا کہ 11 اکتوبر کو عدالتی کمیشن کی عبوری جانچ رپورٹ موصول ہوئی۔ کمیشن نے رپورٹ کا تفصیلی مطالعہ اور غور و خوض کرنے کے بعد یہ فیصلہ کیا کہ تحریری مقابلہ جاتی امتحانات میں رازداری، شفافیت اور پاکیزگی کے ساتھ ساتھ امتحان کا شبہ سے بالاتر ہونا بھی ضروری ہے ۔
پریس نوٹ میں کہا گیا کہ اس امتحان سے متعلق امیدواروں اور عام عوام، دونوں کا امتحان کے نظام پر مکمل اعتماد ہونا لازم ہے ۔ چونکہ اس معاملے کی تفتیش ابھی جاری ہے ، لہٰذا کمیشن نے فیصلہ کیا ہے کہ امتحان کی پاکیزگی، رازداری، شفافیت اور ساکھ کو برقرار رکھنے کے لیے 21 ستمبر 2025 کو منعقدہ امتحان کو منسوخ کرنا ہی مناسب ہوگا۔
اسی کے تحت، 21 ستمبر کو منعقد گریجویٹ سطح کا امتحان منسوخ کیا جاتا ہے اور اس کی دوبارہ امتحان تین ماہ بعد منعقد کرنے کی تجویز پیش کی گئی ہے ۔