چھتیس گڑھ کابینہ کا بڑا فیصلہ، کسانوں سے دھان 3100 روپے فی کوئنٹل پر خریدا جائے گا

رائے پور، 10 اکتوبر (یواین آئی) چھتیس گڑھ کے وزیر اعلی وشنو دیو سائی کی زیر صدارت جمعہ کے روز منترالیہ مہاندی بھون میں کابینہ کی میٹنگ میں ریاست کی ترقی کے لیے کئی اہم فیصلے کیے گئے ، جن میں ریاستی کسانوں سے دھان کی 3,100 روپے فی کوئنٹل کی شرح سے خریداری بھی شامل ہے ۔
وزیر اعلیٰ سائی کی صدارت میں منعقدہ اس کابینہ اجلاس میں کسانوں کے مفاد میں دھان خریداری سے متعلق بڑے فیصلے کیے گئے ۔
ریاستی حکومت نے خریف مارکیٹنگ سال 2025-26 کے لیے فیصلہ کیا ہے کہ 25 لاکھ سے زائد کسانوں سے 3100 روپے فی کوئنٹل کی شرح پر دھان خریدا جائے گا۔
دھان کی خریداری 15 نومبر 2025 سے 31 جنوری 2026 تک کی جائے گی اور کسانوں کو فروخت کے بعد چھ سے سات دن کے اندر ادائیگی کی جائے گی۔
کسانوں کو سوسائٹیوں میں لمبی قطاروں سے نجات دینے کے لیے اس سال تُنہَر ہاتھ موبائل ایپ کے ذریعے آن لائن ٹوکن سسٹم نافذ کیا گیا ہے ، جس کے تحت کسان اپنی سہولت کے مطابق دن منتخب کر کے ٹوکن حاصل کر سکیں گے ۔
دھان خریداری میں شفافیت بڑھانے کے لیے اس بار ای-کے وائی سی اور ایگری اسٹیک پورٹل پر کسانوں کا اندراج لازمی قرار دیا گیا ہے ۔
کسان 31 اکتوبر 2025 تک اپنا رجسٹریشن کر سکتے ہیں۔