ہماچل پردیش میں منالی-لیہہ روٹ پر ٹریفک بحال

شملہ، 10 اکتوبر (یو این آئی) ہماچل پردیش میں شدید برف باری کی وجہ سے کئی دنوں سے بند منالی-لیہہ راستہ گاڑیوں کی آمدورفت کے لیے دوبارہ کھول دیا گیا ہے ۔
بارڈر روڈز آرگنائزیشن (بی آر او) نے سطح سمندر سے 16,500 فٹ کی بلندی پر واقع درہ برلاچہ سے برف ہٹا دی ہے اور اس اسٹریٹجک راستے پر ٹریفک بحال کر دیا ہے ۔
محکمہ موسمیات کے مطابق ہماچل پردیش میں بہتر موسم اور دھوپ کی وجہ سے میدانی اور پہاڑی علاقوں میں درجہ حرارت میں اضافہ ہوا ہے ۔ گزشتہ 24 گھنٹوں کے دوران کئی مقامات پر زیادہ سے زیادہ درجہ حرارت میں نمایاں اضافہ ریکارڈ کیا گیا ہے ۔ گزشتہ چند دنوں سے ہورہی برف باری کی وجہ سے بلند پہاڑی علاقوں میں سرد موسم بدستور برقرار ہے ، کئی علاقوں میں کم سے کم درجہ حرارت نقطہ انجماد سے نیچے رہ گیا ہے ۔
محکمہ موسمیات کے مطابق شملہ میں آج بعض مقامات پر ہلکی بارش اور برفباری کا امکان ہے ۔ ہفتہ سے 16 اکتوبر تک موسم صاف رہنے کی توقع ہے ۔ ہماچل پردیش میں، پونٹا صاحب میں زیادہ سے زیادہ درجہ حرارت 21.0 ڈگری سیلسیس ریکارڈ کیا گیا جب کہ کیلانگ میں کم از کم درجہ حرارت منفی 2.3 ڈگری سیلسیس ریکارڈ کیا گیا۔