پٹنہ جنکشن پرکیلے کی فروخت پرروک، گندگی روکنے کے لئے ریلوے نے پابندی عائد کی

پٹنہ، 10 اکتوبر (یو این آئی): ریلوے نے پٹنہ جنکشن احاطے میں کیلے کی فروخت پر مکمل طور پر پابندی عائد کر دی ہے ۔
ریل انتظامیہ کا کہنا ہے کہ چھلکے والے پھلوں، خاص طور پر کیلے کی وجہ سے پلیٹ فارم اور اسٹیشن احاطے میں گندگی پھیل رہی تھی، جس کی وجہ سے صفائی برقرار رکھنا مشکل ہو رہا تھا۔
ریلوے کی جانب سے جاری حکم نامے کے مطابق اب جنکشن احاطے میں صرف 12 مقررہ پھلوں کی ہی فروخت کی اجازت ہوگی۔ ان تمام پھلوں کو یا تو بغیر چھلکے کے کھایا جا سکتا ہے یا ان کے چھلکے سے گندگی پھیلنے کا امکان بہت کم ہوتا ہے ۔ جن 12 پھلوں کی فروخت کی اجازت دی گئی ہے ان میں سیب، انگور، ککڑی، امرود، کھیرا، انار، انناس، کھجور، پپیتا (کٹا ہوا اور ثابت)، مالٹا، آم اور پپیتا ثابت شامل ہیں۔
ریلوے حکام کے مطابق اسٹیشن احاطے کی صفائی کو برقرار رکھنے کے پیش نظر یہ قدم اٹھایا گیا ہے ۔ چھلکے والے پھل، خصوصاً کیلا، پلیٹ فارم پر گندگی پھیلانے کا اہم سبب بن رہے تھے ، جس سے مسافروں کو دشواری ہو رہی تھی اور سوچھ بھارت مشن کے معیار پر بھی اثر پڑ رہا تھا۔
ایک تخمینے کے مطابق پٹنہ جنکشن سے روزانہ 285 سے زائد ٹرینوں کی آمد و رفت ہوتی ہے اور تقریباً سوالاکھ سے زائد مسافر یہاں سے گزرتے ہیں۔ مسافروں کے درمیان سب سے زیادہ پسند کئے جانے والے پھلوں میں کیلا سرفہرست رہا ہے ، کیونکہ یہ سستا، غذائیت سے بھرپور اور آسانی سے دستیاب ہوتا ہے ، لیکن اب یہ آپشن انہیں اسٹیشن احاطے میں دستیاب نہیں ہوگا۔
ریلوے نے پھل فروشوں کو قیمتوں کی کنٹرول شدہ فہرست اور پھل فروخت کرنے کے واضح ہدایات دے دی ہیں۔ اگر کوئی فروخت کنندہ مقررہ اصولوں کی خلاف ورزی کرتا پایا گیا تو اس کے خلاف سخت کارروائی کی جائے گی۔
حکام نے بتایا کہ یہ فیصلہ مسافروں کی سہولت اور صاف ستھرا ماحول یقینی بنانے کے لیے لیا گیا ہے ۔ ساتھ ہی مسافروں سے بھی اپیل کی گئی ہے کہ وہ اسٹیشن احاطے کو صاف ستھرا رکھنے میں تعاون کریں۔