ردو بک ریویو’ کے تیس سال مکمل، تازہ شمارہ کا اجرا

نئی دہلی۔ 10 اکتوبر(یواین آئی) اردو دنیا کا معروف مجلہ ‘اردو بک ریویو’ گزشتہ تیس برسوں سے شائع ہو رہا ہے ۔ اکتیسواں سال مکمل ہونے کو ہے ۔ تازہ شمارہ جولائی تا ستمبر 2025 کا اجرا معروف سینئر صحافی جناب منصور آغا اور اردو ڈیولپمنٹ آرگنائزیشن کے قومی صدر ڈاکٹر سیّد احمد خاں کے ہاتھوں عمل میں آیا۔ یہ اطلاع پریس کے لیے جاری ایک ریلیز میں دی گئی۔
اجرا کے موقع پر مجلہ ‘اردو بک ریویو’ کے ایڈیٹر محمد عارف اقبال کے علاوہ وفا اعظمی، اسرار اُجینی، ڈاکٹر خورشید عالم، ڈاکٹر مظفر حسین غزالی، محمد عرفان جونپوری اور جناب منصور آغا کی اہلیہ محترمہ بھی موجود تھیں۔
منصور آغا نے ‘اردو بک ریویو’ کے تیس سال مکمل ہونے پر نیک خواہشات کا اظہار کرتے ہوئے اس رسالہ کی دستاویزی اہمیت پر روشنی ڈالی۔ انہوں نے مزید کہا کہ ‘اردو بک ریویو’ کے ذریعے نہ صرف ہندوستان بلکہ عالمی سطح پر اردو کی نمائندگی ہو رہی ہے ۔ یہ میری نظر میں اردو زبان و ادب اور تاریخ کی بہت بڑی خدمت ہے ۔
انہوں نے یہ بھی کہا کہ ‘اردو بک ریویو’ کے ایڈیٹر محمد عارف قابل مبارکباد ہیں۔ وہ بڑی مستعدی کے ساتھ تسلسل سے اردو بک ریویو شائع کر رہے ہیں۔ ڈاکٹر سیّد احمد خاں نے کہا کہ ‘اردو بک ریویو’ کے تیس سال مکمل ہونے پر اہل علم کو چاہیے کہ اس کی خدمات سے اردو دنیا کو روشناس کرائیں۔