دہلی میں غیر قانونی ہتھیار سپلائی کرنے والے گینگ کا پردہ فاش

نئی دہلی، 7 اکتوبر (یو این آئی) دہلی پولس کے بیرونی ضلع نے سماج دشمن عناصر اور غیر قانونی اسلحہ ڈیلروں کے خلاف جاری مہم میں ایک بڑی کامیابی حاصل کی ہے ۔ راج پارک اور نہال وہار تھانوں کی پولیس نے ضلع کے اسپیشل اسکواڈ کے ساتھ مل کر مشترکہ کارروائی کرتے ہوئے 10 مجرموں کو گرفتار کیا۔ ان میں سے چار مجرموں سے چھریاں اور چھ سے غیر قانونی پستول اور کارتوس برآمد ہوئے ۔
ڈپٹی کمشنر آف پولیس سچن شرما نے منگل کو کہا کہ یہ کارروائی جرائم پر قابو پانے کی مہم کے ایک حصے کے طور پر کی گئی۔ راج پارک پولیس نے دوران گشت دو سرگرم جرائم پیشہ افراد کو گرفتار کرلیا۔
پہلی کارروائی میں یو بلاک منگول پوری کے علاقے میں ایک مشکوک شخص کو روکنے کی کوشش کی گئی۔ اس نے فرار ہونے کی کوشش کی لیکن پولیس نے اسے پکڑ لیا۔ ملزم کی شناخت راہول عرف نٹا کے نام سے ہوئی ہے ۔ اس کی تلاشی کے دوران ایک چاقو برآمد ہوا۔ تفتیش سے معلوم ہوا کہ وہ سات مقدمات میں ملوث ہے اور راج پارک تھانے کا اشتہاری مجرم ہے ۔ دوسری کارروائی میں کرشنا نامی نوجوان کو چھٹھ پوجا پارک کے قریب سے پکڑا گیا اور اس کے پاس سے ایک بٹن سے کھلنے والا چاقو بھی برآمد کیا گیا۔
پہلی کارروائی میں پولیس نے ایف بلاک لکشمی پارک کے علاقے سے گورو عرف گولو کو گرفتار کیا جو اس سے قبل لوٹ اور چوری کی تین وارداتوں میں ملوث تھا۔ اس کے پاس سے بٹن کھولنے والا چاقو برآمد ہوا۔
دوسری کارروائی میں ڈھاکہ وہار کے علاقے میں منوج نامی شخص کو گرفتار کیا گیا اس کے پاس سے ایک چاقو بھی برآمد ہوا۔ دونوں کے خلاف آرمس ایکٹ کے تحت مقدمہ درج کر لیا گیا ہے ۔
ایک خفیہ اطلاع پر کارروائی کرتے ہوئے ، اسپیشل اسکواڈ نے نہال وہار، نیلوتھی اور میرا باغ روڈ علاقوں میں ایک غیر قانونی اسلحہ سپلائی چین کا پردہ فاش کیا۔
سب انسپکٹر انکت سنگھ اور ان کی ٹیم نے ، انسپکٹر روہت کی قیادت میں 26 ستمبر سے 3 اکتوبر تک پانچ آپریشن کیے ، چھ مجرموں کو گرفتار کیا جن کے نام روی، آیوش، دیپک یادو، سنجے عرف سنجو، وپل، اور رشبھ پال۔
ان کارروائیوں میں پولیس نے تین سیمی آٹومیٹک پستول، ایک دیسی ساختہ پستول اور چھ زندہ کارتوس برآمد کئے ۔ پوچھ گچھ کے دوران یہ بات سامنے آئی کہ یہ مجرم دہلی-این سی آر خطہ میں گینگوں کو ہتھیار فراہم کرتے تھے ۔