ہندوستان میں غیر قانونی طور پر مقیم نائجیرین شہری گرفتار، ملک بدری کا عمل شروع

نئی دہلی، 7 اکتوبر (یو این آئی) ساؤتھ ویسٹ ڈسٹرکٹ پولس کی اے اے ٹی ایس ٹیم نے نائجیریا کے ایک شہری اپیہ نننا مالاچی کو گرفتار کیا جو بغیر کسی ویزا کے پچھلے چار سالوں سے غیر قانونی طور پر ہندوستان میں رہ رہا تھا۔ فارنرز ریجنل رجسٹریشن آفس (ایف آر آر او)، دہلی کی مدد سے ، پولیس نے اسے اس کے ملک بھیجنے کی کارروائی شروع کردی ہے ۔
ڈپٹی کمشنر آف پولیس امت گوئل نے آج کہا کہ انسپکٹر رام کمار کی قیادت میں ٹیم غیر قانونی طورپر مقیم غیر ملکی شہریوں کی شناخت اور گرفتاری میں سرگرم عمل تھی۔ 3 اکتوبر کو اے ایس آئی ونود کمار اور اے ایس آئی دھرمیندر کو اطلاع ملی کہ ایک نائجیرین شہری ننگل رایا، وسنت کنج ساؤتھ میں کرائے پر رہائش تلاش کر رہا ہے ۔ پولیس نے مشتبہ شخص کو حراست میں لے کر دستاویزات طلب کیں لیکن وہ کوئی درست دستاویزات پیش کرنے سے قاصر رہا۔ دوران تفتیش ملزم نے انکشاف کیا کہ وہ 2021 میں میڈیکل ویزے پر ہندوستان آیا تھا جس کی میعاد 24 مئی 2021 کو ختم ہو گئی تھی۔
اس کے بعد وہ براڑی میں رہنے لگا، لیکن پولیس کی تلاش سے بچنے کے لیے وسنت کنج آگیا۔ پولیس نے اس کے پاس سے نائجیرین دستاویزات برآمد کیں۔ فی الحال ملک بدری کی کارروائی جاری ہے ۔