کابینہ نے ریلوے کے چار ملٹی ٹریکنگ منصوبوں کی منظوری دی

نئی دہلی، 7 اکتوبر (یواین آئی) حکومت نے مہاراشٹر، مدھیہ پردیش، گجرات، اور چھتیس گڑھ کے 18 اضلاع کا احاطہ کرنے والے چار ریلوے ملٹی ٹریکنگ پروجیکٹوں کو منظوری دی ہے ، جس کے بعد ہندوستانی ریلوے کے موجودہ نیٹ ورک تقریباً 894 کلومیٹر تک بڑھ جائے گا۔
وزیر اعظم نریندر مودی کی صدارت میں کابینہ نے منگل کو یہاں منعقدہ میٹنگ میں ان چار پروجیکٹوں کی تجاویز کو منظوری دی۔ میٹنگ کے بعد ایک پریس کانفرنس سے خطاب کرتے ہوئے ریلوے اور اطلاعات و نشریات کے وزیر اشونی وشنو نے کہا کہ ان پروجیکٹوں کی تخمینہ لاگت تقریباً 24,634 کروڑ روپے ہے ۔
انہوں نے کہا کہ اس تجویز میں شامل پروجیکٹوں میں 314 کلومیٹر پر محیط مہاراشٹر میں وردھا-بھساول سیکشن پر تیسری اور چوتھی لائن کی تعمیر شامل ہے ۔ دوسری چھتیس گڑھ میں گونڈیا-ڈونگر گڑھ سیکشن کی چوتھی لائن ہے ، جو 84 کلومیٹر پر پھیلی ہوئی ہے ۔
ریلوے کے وزیر نے یہ بھی بتایا کہ گجرات اور مدھیہ پردیش میں وڈودرا-رتلام سیکشن کی تیسری اور چوتھی لائنیں 259 کلومیٹر پر پھیلی ہوئی ہیں۔ چوتھا پروجیکٹ مدھیہ پردیش میں اٹارسی-بھوپال-بینا روٹ پر 237 کلو میٹر طویل چوتھی لائن بنائے گا۔
مسٹر ویشنو نے کہا کہ ان چار پروجیکٹوں کے مکمل ہونے پر مہاراشٹر، مدھیہ پردیش، گجرات، اور چھتیس گڑھ ریاستوں کے 18 اضلاع کا احاطہ کرتے ہوئے ملک میں ریل نیٹ ورک تقریباً 894 کلومیٹر تک پھیل جائے گا۔ منظور شدہ ملٹی ٹریکنگ پروجیکٹ سے تقریباً 100 کلومیٹر کا رابطہ بڑھے گا اور 3,633 دیہاتوں کے تقریباً 85.84 لاکھ لوگوں کو فائدہ پہنچے گا۔