راہل گاندھی چار ممالک کے دورے پر روانہ

نئی دہلی، 27 ستمبر (یو این آئی) کانگریس کے سابق صدر اور لوک سبھا میں اپوزیشن کے رہنما راہل گاندھی جنوبی امریکہ کے چار ممالک کے دورے پر روانہ ہو گئے ہیں۔
کانگریس کے محکمہ مواصلات کے سربراہ پون کھیڑا نے ہفتہ کے روز یہ اطلاع دیتے ہوئے بتایا کہ اس سفر کے دوران مسٹر گاندھی برازیل اور کولمبیا سمیت چار ممالک کے سیاسی رہنماؤں، یونیورسٹی کے طلبہ اور تجارتی برادری کے نمائندوں سے ملاقات کریں گے ۔
انہوں نے کہا کہ راہل گاندھی ان ممالک کے صدور اور دیگر سینئر رہنماؤں کے ساتھ امریکہ کے ٹیرف مہم کے تناظر میں ملاقات کریں گے اور جمہوری اور اسٹریٹیجک تعلقات کو مضبوط بنانے پر بھی تبادلہ خیال کریں گے ۔
وہ کاروباری رہنماؤں سے بھی ملاقات کریں گے تاکہ مزید مواقع تلاش کیے جا سکیں کیونکہ ہندوستان-امریکہ محصولات کے تناظر میں تجارت اور شراکت داری میں تنوع لازمی ہے ۔
کانگریس ذرائع کے حوالے سے مزید کہا گیا کہ ”مسٹر گاندھی کا یہ اہم اور تاریخی دورہ ہے ۔ ہندستان اور جنوبی امریکہ نے نا وابستہ تحریک، گلوبل ساؤتھ میں یکجہتی اور کثیر قطبی عالمی نظام کے تئیں عہد بستگی سے اپنے دیرینہ تعلقات استوار رکھے ہیں۔ مسٹر گاندھی کا یہ دورہ اس روایت کو آگے بڑھاتے ہوئے تجارت، ٹیکنالوجی، پائیداری اور عوامی سطح پر اشتراک و تعاون کے نئے راستے کھولے گا۔