چنڈی گڑھ: معذور بچوں نے ٹریک پر کیا دم خم کا مظاہرہ کیا

چنڈی گڑھ، 27 ستمبر (یو این آئی) چنڈی گڑھ کے سیکٹر 7 میں واقع اسپورٹس کمپلیکس میں ہفتہ کو معذور بچوں کے لیے دو روزہ کھیل اتسو شروع ہوا۔ اس تقریب کا اہتمام لائنز کلب چنڈی گڑھ سنٹرل اور اسپیشل اولمپکس بھارت، چنڈی گڑھ کے اشتراک سے کیا گیا تھا۔
لائنز کلب سینٹرل کے صدر ہریش گوئل نے کہا کہ اس اتسو کا مقصد بچوں، خاص طور پر ذہنی طور پر معذور بچوں کو کھیلوں کے ذریعے ہمت، عزم اور خود اعتمادی کا مظاہرہ کرنے کا موقع فراہم کرانا ہے ۔ انہوں نے کہا ” اسپیشل اولمپکس صرف کھیلوں تک محدود نہیں ہے بلکہ یہ بچوں کی صلاحیتوں اور زندگیوں میں مثبت تبدیلی لانے کی کوشش ہے ۔”
تقریب میں 250 سے زائد شرکاء نے شرکت کی۔ پہلے روز مختلف عمر کے زمروں میں دوڑ، تھرو اور دیگر کھیلوں کے مقابلے ہوئے ۔ میدان میں بچوں کا جوش و خروش قابل دیدتھا۔ شائقین نے بھی تالیوں کے ساتھ ان کی حوصلہ افزائی کی۔
تقریب کے دوران ایک فری ہیلتھ چیک اپ کیمپ کا بھی انعقاد کیا گیا جہاں ماہر ڈاکٹروں نے بچوں کا معائنہ کیا اور ضروری مشورے فراہم کئے ۔ منتظمین کا کہنا تھا کہ کل اختتامی تقریب میں جیتنے والوں کو انعامات سے نوازا جائے گا اور ان کی کامیابیوں کا احترام کیا جائے گا۔