بریلی میں تشدد کے الزام میں مولانا توقیر رضا خان سمیت آٹھ افراد گرفتار؛ تین ہزار نامعلوم افراد کے خلاف مقدمہ درج

بریلی، 27 ستمبر (یو این آئی) مغربی اتر پردیش کے بریلی میں پولس نے ہفتہ کے روز اتحاد ملت کونسل کے سربراہ مولانا توقیر رضا خان سمیت آٹھ لوگوں کو بغیر اجازت کے جلوس نکالنے اور اشتعال انگیز نعرے لگانے کے الزام میں گرفتار کیا گیا ہے ۔
ضلع مجسٹریٹ اویناش سنگھ اور سینئر پولس سپرنٹنڈنٹ انوراگ آریہ نے یہاں مشترکہ پریس کانفرنس میں بتایا کہ مولانا توقیر رضا خان اور دیگر سات افراد کے خلاف بی این ایس کی مختلف فوجداری دفعات کے تحت مقدمہ درج کیا گیا ہے ۔ عدالتی حکم پر تمام آٹھ ملزمان کو 14 دن کے لیے عدالتی تحویل میں بھیج دیا گیا ہے ۔
انہوں نے مزید کہا کہ 3000 نامعلوم افراد کے خلاف بھی مقدمہ درج کیا گیا ہے ۔ بغیر اجازت جلوس نکالنے ، تشدد بھڑکانے اور اشتعال انگیز نعرے لگانے پر کل دس ایف آئی آر درج کی گئی ہیں، جن میں کوتوالی کینٹ تھانے میں پانچ، قلعہ تھانے میں ایک اور بارہ داری تھانے میں ایک ایف آئی آر درج کی گئی ہے ۔ ان کا کہنا تھا کہ شہر میں مکمل طور پر امن ہے ، اور کہیں سے کسی ناخوشگوار واقعے کی اطلاع نہیں ہے ۔
مسٹر انوراگ آریہ نے کہا کہ تشدد بھڑکانے کی سازش میں باہری عناصر کے ملوث ہونے کے امکان کو رد نہیں کیا جا سکتا ہے ۔ پولیس تمام زاویوں سے تفتیش کر رہی ہے اور کسی بھی مجرم کو بخشا نہیں جائے گا۔ انہوں نے مزید کہا کہ پرتشدد ہجوم نے پیٹرول بم کا بھی استعمال کیا، کیونکہ جائے وقوعہ سے برآمد ہونے والی کچھ بوتلوں سے پیٹرول کی بو آرہی تھی۔