پنجاب کے وفد کی بھارت منڈپم میں منعقدہ ورلڈ فوڈ انڈیا-2025 پروگرام میں شرکت

چنڈی گڑھ، 27 ستمبر (یو این آئی) پنجاب کے کابینی وزیر سنجیو اروڑہ کی قیادت میں ہفتہ کے روز ایک وفد نے قومی دارالحکومت میں واقع بھارت منڈپم میں منعقدہ ورلڈ فوڈ انڈیا 2025 پروگرام میں حصہ لیا۔
اس موقع پر "فلیورنگ دی فیوچر فرام فارم گیٹ ٹو گلوبل پلیٹ – ایگرو فوڈ کاروبار میں مواقع کا فروغ” کے موضوع پر پنجاب اسٹیٹ نالج سیشن کا انعقاد کیا گیا۔
جناب اروڑہ نے کہا کہ ریاست کا زرعی شعبہ مضبوط بنیاد رکھتا ہے اور خوراک کی پراسیسنگ کے شعبے میں سرمایہ کاری کی بے پناہ صلاحیت موجود ہے ۔ انہوں نے کہا کہ ریاستی حکومت سرمایہ کار دوست پالیسیاں بنا رہی ہے اور سرمایہ کاروں کو پنجاب میں صنعت قائم کرنے کے لیے 45 دنوں کے اندر تمام ضروری اجازت نامے فراہم کیے جائیں گے ۔ ساتھ ہی انہوں نے خوراک کی پراسیسنگ کے شعبے کے لیے نئی صنعتی پالیسی بنانے کے لیے قائم آزاد کمیٹی کے بارے میں بھی آگاہ کیا۔
کابینی وزیر اروڑہ نے واضح کیا کہ پنجاب حکومت سرمایہ کاروں کو ہر ممکن تعاون فراہم کرنے کے لیے پرعزم ہے ۔ ریاست میں ایگرو فوڈ کے شعبے کو عالمی معیار کا مرکز بنانے کی صلاحیت ہے ، جس سے ریاستی مصنوعات کو کھیتوں سے براہِ راست بین الاقوامی منڈی تک پہنچایا جا سکے گا۔
اس موقع پر وزیر اروڑا نے متحدہ عرب امارات کے لولو گروپ، روس کے جیاک گروپ، این سی ایم ایل، جافزا، الونسنس، بٹزر، حلدیرام اور بیکانیر سمیت دیگر گروپوں کے وفود سے ملاقات کی۔ ان گروپوں نے پنجاب میں سرمایہ کاری میں دلچسپی ظاہر کی۔ خوراک کی ڈبہ بندی کی صنعتوں کے وزیر چراغ پاسوان نے بھی پنجاب پویلین کا دورہ کیا اور اس کی مصنوعات کو سراہا۔ انہوں نے جلد ہی پنجاب کا دورہ کرنے کی یقین دہانی بھی کرائی۔