نئی دہلی//
نائب صدر جمہوریہ ہند کے عہدے کے لیے انتخاب۹ستمبر کو کرایا جائے گا۔ اس کیلئے انتخابی نوٹیفکیشن آئندہ ہفتے جمعرات‘۷؍اگست کو جاری کیا جائے گا۔
الیکشن کمیشن کی طرف سے جمعہ کو جاری کردہ ایک پریس ریلیز کے مطابق، نوٹیفکیشن جاری ہونے کے ساتھ ہی نامزدگی کا عمل شروع ہو جائے گا۔
کاغذات نامزدگی جمعرات ۲۱؍اگست تک داخل کیے جا سکیں گے ، اور کاغذات کی جانچ جمعہ۲۲؍اگست کو کی جائے گی۔ نامزدگی واپس لینے کی آخری تاریخ پیر۲۵؍ اگست ہے ۔
کمیشن نے کہا ہے کہ اگر ضروری ہوا تو پولنگ منگل‘۹ستمبر کو صبح۱۰بجے سے شام ۵بجے تک کرائی جائے گی اور ووٹنگ مکمل ہونے کے بعد اسی دن ریٹرننگ آفیسر کی نگرانی میں ووٹوں کی گنتی بھی کرائی جائے گی۔ ہر ووٹ کی قدریکساں ہوگی۔
کمیشن نے راجیہ سبھا کے جنرل سیکریٹری پرمود چندر مودی کو اس انتخاب کے لیے ریٹرننگ آفیسر مقرر کیا ہے ۔نائب صدر کے انتخاب کے لیے الیکٹورل کالج میں راجیہ سبھا کے تمام منتخب اور نامزد اراکین، نیز لوک سبھا کے تمام منتخب اراکین شامل ہوتے ہیں۔ کمیشن پہلے ہی الیکٹورل کالج کی فہرست تیار کر چکا ہے جس میں کل۷۸۸؍اراکین شامل ہیں۔
اس فہرست میں راجیہ سبھا کے۲۳۳منتخب اور ۱۲نامزد اراکین، اور لوک سبھا کے۵۴۳منتخب اراکین شامل ہیں۔ اس وقت راجیہ سبھا میں ۵؍اور لوک سبھا میں ایک سیٹ خالی ہے ۔
جگدیپ دھنکڑ کے استعفے کے بعدنئے نائب صدر کیلئے یہ انتخاب کرایا جا رہا ہے ۔
