سرینگر//
جنوبی کشمیر کے قاضی گنڈ علاقے میں آج ایک افسوسناک واقعہ پیش آیا، جہاں موٹر فٹنگ کے دوران ایک نوجوان بورویل میں گر گیا۔
اس واقعے کے بعد اسٹیٹ ڈیزاسٹر ریسپانس فورس (ایس ڈی آر ایف) نے فوری طور پر بچاؤ کارروائی شروع کی اور متاثرہ شخص کو بے ہوشی کی حالت میں اسپتال منتقل کیا، جہاں ڈاکٹروں نے اُسے مردہ قرار دیا۔
سرکاری ذرائع نے یو این آئی کو بتایا کہ واقعہ قاضی گنڈ کے لور منڈا علاقے میں پیش آیا، جہاں مشتاق احمد وگے ولد محمد اشرف وگے ساکن دامجن قاضی گنڈ موٹر فٹنگ کے دوران بورویل میں گر گیا۔
ایس ڈی آر ایف کے اہلکاروں نے اطلاع ملتے ہی جائے وقوعہ پر پہنچ کر امدادی کارروائی شروع کی۔ کئی گھنٹوں کی جدوجہد کے بعد نوجوان کو بورویل سے باہر کر نزدیکی اسپتال منتقل کیا، جہاں معالجین نے اُسے مردہ قرار دیا۔
پولیس نے اس حادثے کی نسبت کیس درج کرکے تحقیقات شروع کی، جبکہ علاقے میں غم و اندوہ کی لہر دوڑ گئی ہے ۔
