(ندائے مشرق ڈیسک)
نئی دہلی//
لوک سبھا نے پیر کے روز دہشت گردی کے خلاف صفر رواداری کے عزم کا اظہار کیا اور پہلگام دہشت گردانہ حملے میں ۲۶؍ افراد کی ہلاکت پر تعزیت کا اظہار کیا۔
لوک سبھا اسپیکر اوم برلا نے بھی احمد آباد میں ۱۲جون کو ایئر انڈیا کے طیارہ حادثے میں۲۶۰؍ افراد کی موت پر دکھ کا اظہار کیا۔
برلا نے پیر سے شروع ہونے والے مانسون اجلاس کے لیے لوک سبھا کے اجلاس کے دوران کہا’’۲۲؍ اپریل۲۰۲۵ کو جموں کشمیر کے پہلگام میں دہشت گردانہ حملے میں چھبیس بے گناہ افراد بے دردی سے مارے گئے تھے۔ دہشت گردی کی یہ کارروائی ملک اور پوری دنیا کے شعور پر حملہ تھی ‘‘۔
اسپیکر نے کہا کہ یہ ایوان اس حملے میں ہونے والی ہلاکتوں پر گہرے رنج و غم کا اظہار کرتا ہے اور دہشت گردی کے خلاف بھارت کے صفر رواداری کے عزم کا اعادہ کرتا ہے۔
برلا نے کہا کہ ایئر انڈیا کے حادثے میں۲۴۱ مسافروں اور ۱۹دیگر افراد سمیت ۲۶۰؍ افراد ہلاک ہوئے۔برلا نے کہا کہ اس حادثے میں گجرات کے سابق وزیر اعلی وجے روپانی کی بھی موت ہو گئی۔
اسپیکر نے مزید کہا ’’یہ ایوان اس حادثے کے متاثرین کے اہل خانہ سے دلی ہمدردی کا اظہار کرتا ہے‘‘۔
لوک سبھا نے ملک کے مختلف حصوں میں شدید بارشوں ، سیلاب اور لینڈ سلائیڈنگ جیسی قدرتی آفات سے ہونے والی اموات پر بھی دکھ کا اظہار کیا۔
