پانچ ملی ٹینٹ معاونین گرفتار۔پی ایس اے کے تحت جیل منتقل

سرینگر//
ملک کی سلامتی اور یکجہتی کے لیے خطرہ بننے والے تخریبی اور مجرمانہ عناصر کے خلاف سخت کارروائی کرتے ہوئے سری نگر پولیس نے دہشت گرد تنظیموں سے وابستہ پانچ ملی ٹینٹ معاونین کو پبلک سیفٹی ایکٹ کے تحت جیل منتقل کیا۔
پولیس نے ملزمان کی شناخت ندیم احمد خان ولد غلام محمد خان ساکن پانتھ چوک سری نگر، فیضان اختر بٹ عرف فیضان ولد اختر حسین بٹ ساکن غوثیہ کالونی خانیار، معراج الدین بٹ ولد مرحوم محمد صادق بٹ ساکن پاندچھ نوے فٹ روڈ، عمر حمید شیخ ولد عبدالحمید شیخ ساکن حضرت بل سری نگر اور سہیب شفیع بابا عرف چمنا ساکن رعناواری سری نگر کے بطور کی ہے ۔
پولیس کے مطا بق مذکورہ ملزمان سری نگر پولیس کی تیار کردہ تفصیلی رپورٹس کی بنیاد پر گرفتاری کے احکامات حاصل کرنے کے بعد حراست میں لیے گئے ہیں۔ ان تمام افراد کو گرفتار کر کے کٹھوعہ، ادھم پور اور کوٹ بلوال جموں کی جیلوں میں منتقل کر دیا گیا ہے ۔
واضح رہے کہ ان افراد کے خلاف متعدد مجرمانہ مقدمات درج ہیں۔ اس کے باوجود وہ اپنے غلط راستے ترک کرنے سے گریزاں رہے اور عدالتوں سے ضمانت حاصل کرنے کے بعد بھی وہ کھلے عام مجرمانہ اور تخریبی سرگرمیوں میں ملوث رہے جو ملک کے مفادات کے خلاف ہیں۔
جموں کشمیر پولیس مسلسل سری نگر شہر میں ایسے غیر ملکی سازشوں سے جڑے عناصر کے خلاف کارروائیاں جاری رکھے ہوئے ہے اور ان کی دہشت گرد تنظیموں کی ساخت کو ختم کرنے میں مصروف ہے ۔
جموں و کشمیر پولیس اپنی فول پروف اور غیر متزلزل عزم کا اعادہ کرتی ہے کہ وہ اس خطے میں امن و سلامتی کو نقصان پہنچانے والی مجرمانہ سرگرمیوں کے خاتمے کے لیے قانون کی پوری طاقت استعمال کرے گی۔
ہم ان تمام عناصر کو سخت تنبیہ کرتے ہیں جو ملک کی سلامتی کے لیے نقصان دہ اور غیر قانونی سرگرمیوں میں ملوث ہیں کہ قانون کی گرفت جلد ان تک پہنچے گی اور ہر ملزم کو انصاف کے کٹہرے میں کھڑا کیا جائے گا۔