امر ناتھ یاترا:ڈی جی سی آر پی ایف کا سکیورٹی تیاریوں کا جامع جائزہ

سرینگر//
امر ناتھ یاترا۲۰۲۵کے پرامن، منظم اور فول پروف سکیورٹی انتظامات کو یقینی بنانے کے لیے سی آر پی ایف کے ڈائریکٹر جنرل جی پرتاب سنگھ نے وادی میں زمینی صورتحال، بیس و ٹرانزٹ کیمپوں اور آپریشنل تیاریوں کا تفصیلی جائزہ لیا، جس کے دوران انہوں نے سکیورٹی اداروں کو ہر سطح پر مکمل الرٹ پر رہنے کی ہدایت دی۔
سی آر پی ایف کے ایک ترجمان نے ایکس پر جانکاری فراہم کرتے ہوئے بتایا کہ امرناتھ یاترا ۲۰۲۵ کے پرامن اور محفوظ انعقاد کو یقینی بنانے کے لیے ڈائریکٹر جنرل سی آر پی ایف، نے سکیورٹی تیاریوں کا جامع جائزہ لیا۔
ڈی جی سی آر پی ایف نے نہ صرف بیس اور ٹرانزٹ کیمپوں کا دورہ کر کے وہاں موجود سہولیات اور سکیورٹی انتظامات کا باریک بینی سے مشاہدہ کیا بلکہ واضح پیغام دیا کہ یاتریوں کے لیے ماحول نہ صرف محفوظ بلکہ روحانی طور پر پرسکون ہونا چاہیے ۔
ان کا کہنا تھا’’امر ناتھ یاترا ایک روحانی کارواں ہے ، اس کا تحفظ ہماری اولین ترجیح ہے ۔ ہر قدم، ہر مورچہ، اور ہر جوان اس مقدس فریضے میں مستعد اور مصروفِ عمل ہے ‘‘۔
اپنے دورے کے دوسرے مرحلے میں، ڈی جی سی آر پی ایف نے ریجنل ٹریننگ سینٹر لتہ پورہ میں زیر تربیت جوانوں سے خطاب کرتے ہوئے انہیں نہ صرف سی آر پی ایف کی درخشاں تاریخ یاد دلائی بلکہ ان میں جدید چیلنجز کا سامنا کرنے کا جذبہ بھی ابھارا۔
انہوں نے اس موقع پر کہا’’آپ صرف سپاہی نہیں، قوم کے محافظ اور سی آر پی ایف کی آنے والی نسلوں کے علمبردار ہیں۔ میدان میں آپ کا حوصلہ ہی دشمن کے ارادے توڑتا ہے ‘‘۔
ڈی جی نے لتہ پورہ میں نئے ایڈمن بلاک کا افتتاح بھی کیا، اور تربیتی عملے سے ملاقات کر کے جدید انسدادی حکمت عملیوں اور ابھرتے خطرات سے نمٹنے کے لیے تیاریوں پر زور دیا۔
بعد ازاں، ڈی جی نے ۱۸۵ویں بٹالین سی آر پی ایف کیمپ کا دورہ کیا، جہاں انہوں نے انفراسٹرکچر، انتظامی امور اور آپریشنل تیاریوں کا گہرائی سے جائزہ لیا۔ انہوں نے افسران و جوانوں سے بالمشافہ ملاقات کر کے ان کے مسائل سنے اور ان کی پیشہ ورانہ کارکردگی کو سراہا۔