اگلے پانچ دنوں کے دوران موسم خشک و خوشگوار رہنے کا امکان

سرینگر//
محکمہ موسمیات کی پیش گوئی کے مطابق وادی کشمیر میں اگلے۵دنوں کے دوران موسم عام طور پر خشک و خوشگوار رہنے کا امکان ہے ۔
موسمیات محکمے کے ایک ترجمان کے مطابق وادی میں۱۱؍اپریل کو بھی موسم ابر آلود رہ سکتا ہے اور اس دوران کئی علاقوں میں گرج چمک کے ساتھ رک رک کر بارشیں ہوسکتی ہیں۔
ترجمان نے کہا کہ وادی میں۳۰سے ۴۰کلو میٹر فی گھنٹہ کی رفتار سے تیز ہوائیں بھی چل سکتی ہیں۔
ترجمان نے بتایا کہ ۱۲؍اور۱۷؍اپریل کو وادی میں موسم مجموعی طور پر خشک رہ سکتا ہے ۔انہوں نے کہا کہ بعد ازاں وادی میں۱۸سے۲۰؍اپریل تک موسم ایک بار پھر خراب رہنے کا امکان ہے ۔
محکمے نے اپنی ایڈوئزری میں مسافروں، سیاحوں اور ٹرانسپورٹروں سے کہا ہے کہ وہ ٹریفک ایڈوائزری پر عمل کریں جبکہ کسانوں سے کہا گیا ہے کہ وہ۱۲؍اپریل سے اپنے کھیت کھلیانوں اور باغوں میں آپریشنز دوباری شروع کریں۔
دریں اثنا وادی کے بیشترعلاقوں میں شبانہ درجہ حرارت صفرسے ۲ڈگری سینٹی گریڈ معمول سے زیادہ ریکارڈ ہوا ہے ۔
وادی میں سیاحتی مقام گلمرگ سرد ترین علاقہ رہا ہے جہاں کم سے کم درجہ حرارت۴ء۱ڈگری سینٹی گریڈ ریکارڈ ہوا ہے جبکہ صوبہ جموں میں بھدرواہ سب سے سرد جگہ رہی ہے جہاں شبانہ درجہ حرارت۶ء۷ڈگری سینٹی گریڈ ریکارڈ ہوا ہے ۔
خراب موسمی صورتحال کے باوجود وادی کشمیر کو ملک کے باقی حصوں کے ساتھ جوڑنے والی سرینگر جموں قومی شاہراہ پر ٹریفک کی نقل و حمل جاری ہے ۔
ٹریفک حکام نے بتایا کہ قومی شاہراہ پر مسافر گاڑیوں کی دو طرفہ آمد و رفت جاری ہے تاہم آج یعنی جمعہ کو بڑی گاڑیوں (مال بردار گاڑیوں) کو جموں سے سری نگر جانے کی اجازت ہے ۔انہوں نے کہا کہ قومی شاہراہ پر مہاڑ، کیفٹیریا اور رام بن میں سنگل لین کی وجہ سے ٹریفک کو ریگولیٹڈ طریقے سے چلایا جا رہا ہے ۔ انہوں نے مسافروں سے لین ڈسلپن پر عمل کرنے اور اوور ٹیکنگ کرنے سے احتراز کرنے کی اپیل کی ہے ۔
مسافروں سے مزید کہا گیا ہے کہ وہ قومی شاہراہ پر دن کے دوران ہی سفر اختیار کریں نیز چٹانیں کھسک آنے کے خدشات کے پیش نظر رام بن اور بانہال کے درمیان غیر ضروری قیام کرنے سے پرہیز کریں۔
ان کا کہنا ہے کہ سری نگر لیہہ شاہراہ پر بی آر او کی طرف سے اجازت کے بعد ہی ٹریفک کو بحال کیا جائے گا جبکہ تاریخی مغل روڈ ہنوز بند ہے ۔حکام کا کہنا ہے کہ مغل روڈ پر آنے والے دو تین دنوں کے دوران ٹریفک بحال ہونے کی توقع ہے ۔