وقف ایکٹ کو چیلنج دینے والی عرضیوں پر سپریم کورٹ۱۶ اپریل کو سماعت کرے گا

نئی//
چیف جسٹس سنجیو کھنہ کی سربراہی میں سپریم کورٹ کی تین رکنی بنچ وقف (ترمیمی) ایکٹ۲۰۲۵کے آئینی جواز کو چیلنج دینے والی عرضیوں پر ۱۶؍اپریل کو سماعت کرے گی۔
سپریم کورٹ کی ویب سائٹ کے مطابق جسٹس سنجے کمار اور جسٹس کے وی وشوناتھن بھی عرضیوں کی سماعت کیلئے بنچ کا حصہ ہیں۔
مرکز نے منگل کے روز سپریم کورٹ میں کیویٹ دائر کیا اور اس معاملے میں کوئی حکم جاری ہونے سے پہلے سماعت کی مانگ کی۔
ہائی کورٹ اور سپریم کورٹ میں ایک فریق کی طرف سے کیویٹ دائر کیا جاتا ہے تاکہ اس بات کو یقینی بنایا جاسکے کہ اس کو سنے بغیر کوئی حکم جاری نہ کیا جائے۔
سپریم کورٹ میں۱۰ سے زیادہ عرضیاں دائر کی گئی ہیں جن میں سیاست دانوں، آل انڈیا مسلم پرسنل لا بورڈ (اے آئی ایم پی ایل بی) اور جمعیتہ علماء ہند کی عرضیاں بھی شامل ہیں۔
مرکزی حکومت نے منگل کے روز وقف (ترمیمی) ایکٹ،۲۰۲۵کو نوٹیفائی کیا، جسے پچھلے ہفتے پارلیمنٹ نے منظور کیا تھا۔(پی ٹی آئی)