بڈگام میں ٹریفک حادثے میں ڈرائیور جاں بحق‘۳ زخمی

سرینگر//
ضلع بڈگام کے پرنیوا-کولبگ جنرل روڈ پر جمعہ کو ایک سڑک حادثے میں ایک شخص کی موت ہو گئی اور تین دیگر زخمی ہو گئے۔
ایک عہدیدار نے ایک مقامی خبر رساں ادارے کو بتایا کہ ایک آلٹو گاڑی تویرا گاڑی سے ٹکرا گئی۔اس کے نتیجے میں آلٹو ڈرائیور اور تویرا میں سوار تین مسافر زخمی ہو گئے۔
عہدیدار نے کہا کہ زخمیوں کو بڈگام کے ضلع اسپتال منتقل کیا گیا جہاں ڈاکٹروں نے آلٹو ڈرائیور کو مردہ قرار دے دیا۔اس کی شناخت ذیشان اشرف ولد محمد اشرف ساکن ٹوکر پورہ بڈگام کے طور پر ہوئی ہے۔
عہدیدار نے مزید کہا کہ نوٹس لیا گیا ہے اور پولیس کی ایک ٹیم کو موقع پر تعینات کیا گیا ہے۔
دریں اثناجنوبی کشمیر کے ضلع کولگام کے قاضی گنڈ علاقے میں جمعہ کی صبح ایک سڑک حادثے میں۵مسافر زخمی ہوئے ۔
ذرائع نے بتایا کہ قاضی گنڈ میں میر بازار کے نزدیک جمعہ کی صبح ایک ٹاٹا موبائل گاڑی حادثے کا شکار ہوئی جس کے نتیجے میں گاڑی میں سوار پانچ افراد زخمی ہوگئے ۔
ذرائع نے کہا کہ زخمیوں کو علاج و معالجے کے لئے فوری طور پر گورنمنٹ میڈیکل کالج اننت ناگ پہنچایا گیا۔
زخمیوں کی شناخت نصرت جان زوجہ محمد جبار، سیرت جان دختر محمد جبار، عزرار ولد محمد جبار، سجاد احمد ولد منظور احمد اور ابرار احمد ولد محمد خالق ساکنان بکروال چک منزموہ کے طور پر ہوئی ہے ۔