کشمیر موسم خشک و خوشگوار‘ماہ رواں کے اختتام تک کسی بڑی تبدیلی کا کوئی امکان نہیں

سرینگر//
وادی کشمیر میں موسم خشک و خوشگوار ہے اور محکمہ موسمیات کی پیش گوئی کے مطابق وادی میں ماہ رواں کے اختتام تک موسم میں کسی بڑی تبدیلی کا کوئی امکان نہیں ہے ۔
موسمیات محکمے کے ایک ترجمان نے بتایا کہ وادی میں۲۰سے۲۶مارچ تک موسم مجموعی طور پر خشک رہنے کا امکان ہے تاہم اس دوران۲۵مارچ کی شام کو کہیں کہیں ہلکی برف باری یا بارشیں ہوسکتی ہیں۔
ترجمان نے کہا کہ وادی میں۲۷؍اور۲۸مارچ کو پہاڑی علاقوں میں کہیں کہیں ہلکی برف باری یا بارشیں متوقع ہیں۔
موسمیات محکمے کے ترجمان نے کہا کہ بعد ازاں۲۹سے۳۱مارچ تک موسم ایک بار پھر مجموعی طور پر خشک رہنے کا امکان ہے ۔انہوں نے بتایا کہ وادی میں ماہ رواں کے اختتام تک موسم میں کسی بڑی تبدیلی کا کوئی امکان نہیں ہے ۔
محکمے نے اپنی ایڈوائزری میں کہا ہے کہ مسافروں، سیاحوں اور ٹرانسپورٹروں کو ٹریفک ایڈوائزریز پر عمل کرنا چاہئے ۔
ترجمان نے کسانوں سے کہا ہے کہ وہ اپنے کھیت کھلیانوں اور باغوں میں اپنے آپریشنز جاری رکھیں جبکہ لوگوں سے کہا گیا ہے ان علاقوں میں جانے سے گریز کریں جہاں برفانی تودے گر آنے کے خطرے رہتے ہیں۔
دریں اثنا وادی میں شبانہ درجہ حرارت میں بہتری واقع ہوئی ہے ۔
سیاحتی مقام گلمرگ وادی کی سرد ترین جگہ رہی ہے جہاں کم سے کم درجہ حرارت منفی۶ء۱ڈگری سینٹی گریڈ ریکارڈ ہوا ہے جبکہ وادی کے دوسرے مشہور سیاحتی مقام پہلگام میں شبانہ درجہ حرارت۲ء۳ڈگری سینٹی گریڈ ریکارڈ ہوا ہے ۔