سری نگر میں آتشزدگی کی واردات میں۹مکان خاکستر‘۲؍اہلکار زخمی

سرینگر//
وسطی ضلع سرینگر کے راج باغ کرسو اور عید گاہ علاقوں میں پیر کے روز آتشزدگی کی دو الگ الگ وارداتوں میں۹رہائشی مکان خاکستر ہوئے جبکہ محکمہ فائر اینڈ ایمرجنسی کے دو اہلکار زخمی ہوگئے ۔
ذرائع نے بتایا کہ راج باغ کرسو میں پیر کے روز ایک مکان سے آگ نمودار ہوئی جس کے شعلوں نے متصل واقع مکانوں کو اپنی لپیٹ میں لے لیا۔
محکمہ فائر اینڈ ایمرجنسی کے ایک عہدیدار نے بتایا کہ اس آتشزدگی کے بارے میں قریب پونے بارہ بجے اطلاع موصول ہوئی جس کے ساتھ ہی۸فائر ٹنڈرس کو جائے واردات کی طرف بھیج دیا گیا۔
انہوں نے کہا کہ آگ کو قابو میں کرلیا گیا ہے تاہم اس واردات میں۵رہائشی مکانوں کو نقصان پہنچا ہے ۔ان کا کہنا تھا کہ آگ لگنے کی وجوہات معلوم کی جا رہی ہیں تاہم کسی جانی نقصان کی کوئی اطلاع نہیں ہے ۔
آتشزدگی کی ایک اور واردات میں سری نگر کے عید گاہ علاقے میں۴رہائشی مکان خاکستر جبکہ دو فائر ٹنڈرس زخمی ہوگئے ۔
متعلقہ محکمے کے ایک عہدیدار نے بتایا کہ سرینگر کے عید گاہ علاقے میں پیر کے روز۲بجکر۲۰منٹ پر آگ لگنے کے بارے میں ایک اطلاع موصول ہوئی۔انہوں نے کہا کہ اس اطلاع پر کارروائی کرتے ہوئے۹فائر ٹنڈرس کو جائے واردات پر بھیج دیا گیا۔
ان کا کہنا ہے کہ آگ کی اس واردات میں۴ رہائشی مکانوں کو نقصان پہنچا جبکہ دو فائر ٹنڈرس زخمی ہوگئے ۔زخمیوں کی شناخت فیاض احمد اور محمد یعقوب کے طور پر کی گئی ہے ۔