فوج کی وائٹ نائٹ کور کے جی او سی کا راجوری سیکٹر کا دورہ

جموں//
فوج کی وائٹ نائٹ کور کے جنرل افیسر کمانڈنگ (جی او سی) لیفٹیننٹ جنرل نوین سچدیوا نے ریاسی اور راجوری کا دورہ کیا اور وہاں پر تازہ ترین سیکورٹی صورتحال کا جائزہ لیا۔
وائٹ نائٹ کور نے’ایکس‘پر اپنے ایک پوسٹ میں کہا’’وائٹ نائٹ کور کے جی او سی نے ریاسی اور راجوری میں اگلی چوکیوں کا دورہ کیا اور وہاں تازہ سیکورٹی صورتحال اور آپریشنل تیاریوں کا جائزہ لیا‘‘۔
فوجی کمان کمانڈر نے کہا کہ جی او سی نے تمام رینکوں کو انسداد دہشت گردی کی کارروائیوں کے دوران پیشہ ورانہ مہارت اور چوکسی کے اعلیٰ ترین معیار کو برقرار رکھنے کی تاکید کی۔
معلوم ہوا ہے کہ امکانی دراندازی کے پیش نظر سرحدوں پر تعینات جوانوں کو چوبیس گھنٹے متحرک رہنے کے احکامات صادر کئے گئے ہیں۔
اس دوران جموںکشمیر کے پونچھ ضلع میں لائن آف کنٹرول کے متصل کئی جنگلی علاقوں میں سیکورٹی فورسز نے بڑے پیمانے پر تلاشی آپریشن شروع کیا ہے ۔
اطلاعات کے مطابق پونچھ کے گلپور سیکٹر میں کل ناجنگ معاہدے کی خلاف ورزی کے بعد سیکورٹی فورسز نے پیر کی صبح ایل او سی کے متصل کئی جنگلی علاقوں میں تلاشی آپریشن لانچ کیا۔
ذرائع نے بتایا کہ کھوجی کتوں اور ڈرون کیمروں کی مدد سے جنگلی علاقوں کو کھنگالا جا رہا ہے ۔
ذرائع نے یہ بھی بتایا کہ تلاشی آپریشن کے دوران جدید ٹیکنالوجی کو بھی بروئے کارلایا جارہا ہے ۔
دفاعی ذرائع نے پونچھ اور راجوری کے جنگلی علاقوں میں تلاشی آپریشن شروع کرنے کی تصدیق کرتے ہوئے بتایا کہ ملک دشمن عناصر کے منصوبوں کو ناکام بنانے کی خاطر ایل او سی پر فوج کی تعیناتی بڑھائی گئی ہے ۔
انہوں نے کہاکہ امکانی دراندازی کے پیش نظر لائن آف کنٹرول پر ہائی الرٹ جاری کیا گیا ہے ۔