کشمیر بہتر امن و امان کے ساتھ مثبت تبدیلی کی راہ پر گامزن ہے : صوبائی کمشنر کشمیر

سرینگر//
صوبائی کمشنر کشمیر‘ وی کے بدھوری کا کہنا ہے کہ وادی کشمیر میں مثبت تبدیلی امن و امان میں بہتری اور اس میں عوام کی زیادہ سے زیادہ شرکت کا نتیجہ ہے ۔
بدھوری نے کہا کہ جموںکشمیر میں منعقد ہونے والے حالیہ پارلیمانی اور اسمبلی انتخابات میں لوگوں کی بڑھ چڑھ کر شرکت کی دنیا بھر میں سراہنا کی گئی۔
صوبائی کمشنر نے ان باتوں کا اظہار ہفتے کو یہاں قومی ووٹر ڈے پر نامہ نگاروں کے ساتھ بات کرنے کے دوران کیا۔
بدھوری نے کہا’’جموںکشمیر میں منعقد ہونے والے حالیہ پارلیمانی اور اسمبلی انتخابات میں لوگوں نے بڑھ چڑھ کر حصہ لیا جس کی دنیا بھر میں سراہنا کی گئی اور الیکشن کمیشن آف انڈیا نے بھی اس کو سراہا‘‘۔
صوبائی کمشنرکا کہنا تھا’’تمام الیکشن مشنری اور سیاسی جماعتیں بھی اس کیلئے مبارکبادی کی حقدار ہیں کیونکہ کہیں بھی دوبارہ پولنگ نہیں ہوئی‘‘۔
کشمیر کی تعمیر و ترقی کے حوالے سے بات کرتے ہوئے بدھوری نے کہا کہ کنکٹوٹی ہمارا ایک اہم سیکٹر ہے ۔انہوں نے کہا’’کچھ برس پہلے چلہ کلان کے دوران سونہ مرگ میں ہوٹل وغیرہ کے چلنے کے بارے میں کوئی سوچ بھی نہیں سکتا تھا لیکن آج امن و قانون کی صورتحال تبدیل ہوئی ہے اور لوگوں کا بھی اس میں بڑا رول ہے ‘‘۔
بدھوری نے ترقی کیلئے قیام امن کو ضروری قرار دیتے ہوئے کہا کہ بڑھتے ہوئے ریل رابطوں سے جموں وکشمیر میں ترقی کی نئی راہیں کھل جائیں گی۔
چنار کے درختوں کی جیو ٹیگنگ پر بات کرتے ہوئے صوبائی کمشنر نے کہا کہ یہ کشمیر کے ورثے کے تحفظ کے لیے ایک اہم قدم ہے ۔انہوں نے یقین دلایا کہ خطے کی بھرپور ماحولیاتی اور ثقافتی شناخت کے تحفظ کے اقدام میں مزید درختوں کو شامل کیا جائے گا۔
بدھوری نے معراج النبی (ص) اور یوم جمہوریہ پر لوگوں کو پیشگی مبارکباد پیش کی۔
صوبائی کمشنر نے لوگوں کو یوم جمہوریہ کی تقریبات میں بغیر کسی خدشات کے شرکت کرنے کی دعوت دیتے ہوئے کہا’’وہاں کوئی پابندیاں نہیں ہوں گی لوگ وقت پر تشریف لا کر ان میں زیادہ سے زیادہ تعداد میں شرکت کریں‘‘۔
بدھوری نے ترقی کو فروغ دینے اور خطے میں امن کو برقرار رکھنے کے لیے انتظامیہ کے عزم کا اعادہ کیا۔