جموں میں بین الاقوامی سرحد پر بی ایس ایف اہلکاروں اور مسلح در اندازوںمیں فائرنگ کا تبادلہ

جموں//
جموں کے ارینہ سیکٹر میں بین الاقوامی سرحد پر گذشتہ شب بارڈر سیکورٹی فورس(بی ایس ایف) اہلکاروں اور مسلح در اندازوں کے درمیان مختصر فائرنگ کا تبادلہ ہوا جس کے بعد سیکورٹی فورسز نے پورے علاقے کو محاصرے میں لے کر تلاشی آپریشن شروع کر دیا۔
بی ایس ایف کے ایک ترجمان نے اپنے ایک بیان میں کہا کہ ارینہ سیکٹر میں بین الاقوامی سرحد پر اتوار کی شام قریب ساڑھے نو بجے وہاں تعینات بی ایس ایف اہلکاروں نے مشکوک نقل و حمل دیکھی۔
ترجمان نے کہا کہ بی ایس ایف اہلکاروں کے چلینج کرنے پر ان شر پسند عناصر نے کچھ گولیاں چلائیں۔
ان کا بیان میں کہنا تھا کہ سیکورٹی فورسز جوانوں نے جوابی کارروائی کی جس کے بعد وہ واپس بھاگ گئے ۔
بیان میں کہا گیا کہ سیکورٹی فورسز نے پیر کی صبح علاقے میں بڑے پیمانے پر تلاشی آپریشن شروع کر دیا تاکہ یہ پتہ لگایا جا سکے کہ انہوں نے کہیں کوئی اسلحہ مت ڈالا ہے تاہم فی الوقت کچھ بھی بر آمد نہیں ہوا ہے ۔