ضلع بڈگام اور شوپیان میں ڈگری کالجوں کی تعمیر کیلئے محکمہ اعلیٰ تعلیم کو ۱۳۸ کنال اَراضی منتقل کرنے کو منظوری

سرینگر//
اِنتظامی کونسل کی میٹنگ آج یہاں لیفٹیننٹ گورنر منوج سِنہا کی صدارت میں منعقد ہوئی جس میں محکمہ ریونیو کی جانب سے زمین کے مختلف پارسلوں کو عوامی مقاصد کیلئے منتقل کرنے کی تجویز کو منظور دی ۔
اِنتظامی کونسل نے ضلع بڈگام اور شوپیان میں نئے سرکاری ڈگری کالجوں کی تعمیر کیلئے محکمہ اعلیٰ تعلیم کے حق میں ۱۳۸ کنال ۱۱مرلہ اَراضی منتقل کرنے کو منظوری دی۔ یہ اَراضی اعلیٰ تعلیم کو مفت منتقل کی جائے گی۔
اِس فیصلے کا مقصد دونوں اَضلاع میں معیاری اعلیٰ تعلیم تک آسان رَسائی فراہم کرتے ہوئے جموںوکشمیر میں اعلیٰ تعلیمی ماحولیاتی نظام کو مستحکم بنانا ہے ۔نئے کالجوں کو فعال کرنے سے منظور شدہ تعداد کے مطابق تدریسی اور غیر تدریسی عملے کی بھرتی کو بھی فروغ ملے گا۔
اِنتظامی کونسل نے مزید ہدایت دی کہ مختلف اَضلاع میں قائم ہونے والے ڈگری کالجوں کے لئے زمین کی ضرورت کو محکمہ اعلیٰ تعلیم کے ذریعے معیاری بنایا جائے گا۔
مزید برآ ں ، ضلع کپواڑہ کے گائوں پازی پورہ اور چونٹی پورہ میں ۴کنال ( ہر ایک میں دو کنال) کی اراضی کو محکمہ صحت و طبی تعلیم کے حق میں دو آیوش ہیلتھ اینڈ ویلنس مراکز کے قیام کے لئے منتقل کرنے کی منظور ی بھی دی گئی ۔
آیوش ہیلتھ اینڈ ویلنس سینٹر کا قیام اِنڈین میڈیسن سسٹم ( آئی ایس ایم ) کے تحت علاج کو فروغ دے گا اور علاقے کے آیوش پیشہ ور اَفراد کو روزگار کے مختلف مواقع فراہم کرے گا۔
انتظامی کونسل نے ایک اور فیصلے میں جموں و کشمیر کے مختلف اضلاع میں مختلف ترقیاتی کاموں کو انتظامی منظوری دی ۔
انتظامی کونسل نے گاؤں کاتھوری پتنی ٹاپ ، اودھمپور میں اینٹی کورپشن بیورو آفس ڈسٹرکٹ ڈوڈہ کی تعمیر کی منظور دی جس کی تخمینہ لاگت۰۴ء۲۰ کروڑ روپے ہے ۔
یہ پروجیکٹ جوابدہی کو فروغ دے کر جموں و کشمیر میں بدعنوانی سے پاک معاشرے کے قیام، عام لوگوں میں بیداری پیدا کرنا اور سرکاری دفاتر میں سرکاری ملازمین کے خلاف بدعنوانی سے متعلق حقیقی شکایات درج کرانے کیلئے حکام تک آسان رسائی فراہم کرنے کے مقصد کو حاصل کرنے کیلئے انسداد بدعنوانی بیورو کے کام کاج کو مزید تقویت بخشے گا ۔
یہ منصوبہ دو برسوں میں مکمل ہو گا اور نئے دفتر میں انسانی وسائل کی ضروریات کیلئے نئی پوسٹیں تخلیق کر کے روز گار کے مواقع پیدا کئے جائیں گے ۔
جموں و کشمیر یو ٹی میں نئے دفاتر کی عمارتوں کی تعمیر کو ہموار کرنے کیلئے ایسی تمام تجاویز کا جائزہ لیا جائے اور ان کی منظوری دی جائے ۔انتظامی کونسل نے فائنانس ، ہوم اور جنرل ایڈمنسٹریشن کے محکموں کے انتظامی سیکریٹریوں پر مشتمل ایک بلڈنگ اسکریننگ کمیٹی کی تشکیل کی ہدایت دی ہے ۔
مزید براں انتظامی کونسل نے۴۰ء۲۵ کروڑ روپے کی تخمینہ رقم سے سرینگر میں سروس سلیکشن بورڈ کیلئے آفس کمپلیکس کی تعمیر کو بھی منظوری دی ۔ یہ منصوبہ دو سال میں مکمل ہو گا ۔
یہ پروجیکٹ سروس سلیکشن بورڈ کو مناسب سرکاری رہائش فراہم کرے گا اور مختلف سرکاری محکموں کی طرف سے بھیجے گئے مختلف عہدوں کیلئے امیدواروں کی بروقت بھرتی کیلئے بورڈ کے کام کاج میں سہولت فراہم کرے گا ۔ سرینگر میں جے کے ایس ایس بی کیلئے ایک جدید ، کشادہ اور اچھی طرح سے آراستہ دفتری عمارت کی دستیابی بہتر معیار کی خدمات کی فراہمی کے قابل بنائے گی ۔