عمرعبداللہ بی جے پی سے ہاتھ ملانے کیلئے بے چین:سجاد

سرینگر///
جموں کشمیر پیپلز کانفرنس (جے کے پی سی) کے صدر ‘سجاد غنی لون نے آج ‘انڈیا بلاک‘ کے بیان پر وزیر اعلی عمر عبداللہ کو تنقید کا نشانہ بناتے ہوئے الزام لگایا کہ وہ بی جے پی کے ساتھ وابستہ ہونے کیلئے بے چین ہیں۔
لون نے مائیکرو بلاگنگ ویب سائٹ ایکس (سابق ٹوئٹر) سے بات کرتے ہوئے کہا’’اب ہمارے وزیر اعلی چاہتے ہیں کہ انڈیا اتحاد کو ختم کر دیا جائے۔ وہ بی جے پی میں شامل ہونا چاہتے ہیں۔ بہت مایوس۔ لیکن کشمیر میں مٹر کے سائز کا دماغ رکھنے والا کوئی بھی شخص حیران نہیں ہوگا۔ ہم سب یہ جانتے تھے۔’باقی سب بی جے پی ہیں‘ کی بحث پہلے سے لکھی گئی تھی۔ مسکراہٹیں ان لوگوں کیلئے ہیں جو دراصل ’باقی سب بی جے پی ہیں‘کی بحث پر یقین رکھتے ہیں۔ میں دماغ کے سائز پر تبصرہ نہیں کروں گا‘‘۔
قبل ازیں وزیر اعلیٰ عمر عبداللہ نے کہا تھا کہ اگر اتحاد صرف لوک سبھا انتخابات کیلئے ہے تو ہندوستانی بلاک کو ختم کر دینا چاہئے۔
عمر نے کہا کہ یہ بدقسمتی کی بات ہے کہ طویل عرصے سے انڈیا بلاک کا ایک بھی اجلاس منعقد نہیں ہوا۔ انہوں نے کہا’’انڈیا بلاک میں قیادت اور ایجنڈا کی کوئی وضاحت نہیں ہے۔ یہ اتحاد کسی خاص مدت کے لیے نہیں بنایا گیا تھا‘‘۔
وزیر اعلیٰ نے مزید کہا کہ دہلی انتخابات کے بعد ایجنڈا اور قیادت کو واضح کرنے کیلئے ایک اجلاس بلایا جانا چاہئے۔