سرکاری افسر کا روپ دھار کر خاتون کو دھوکہ دینے والا جعلساز گرفتار:پولیس

سرینگر//
سرینگر پولیس نے اپنے آپ کو سرکاری افسر کا روپ دھارنے والے ایک جعلساز کو رشوت کے عوض منشیات فروش کی رہائی کا وعدہ کرنے کے الزام میں گرفتار کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس نے سری نگر میں ایک جعلساز کو گرفتار کیا ہے جس نے سرکاری افسر ہونے کا جھوٹا دعویٰ کیا تھا تاکہ ایک فرد کو منشیات سے متعلق جرائم کے تحت منشیات فروش کو رہا کرنے کا وعدہ کرکے خاطر خواہ رقم کا دھوکہ دیا جائے ۔
ترجمان نے کہا کہ۶جنوری۲۰۲۵کو صفیہ ریاض زوجہ ریاض احمد چنہ کی جانب سے ایک شکایت درج کروائی گئی تھی جس میں شہید گنج کے رہائشی صادق حسن چالو پر ایک سرکاری افسر کا روپ دھارنے اور اس کے ساتھ۲لاکھ روپے کا فراڈ کرنے کا الزام لگایا گیا تھا۔
پولیس ترجمان نے کہا’’شکایت میں کہا گیا کہ ملزم نے شکایت کنندہ کے شوہر کی رہائی میں سہولت فراہم کرنے کیلئے اثر و رسوخ کا جھوٹا دعویٰ کیا جس کو پولیس سٹیشن راجباغ نے منشیات کے ایک مقدمے میں۱۹نومبر۲۰۲۴کو گرفتار کیا تھا‘‘۔
پولیس بیان میں کہا گیا’’جب شکایت کنندہ کو دھوکہ دہی کا پتہ چلا اور اس نے رقم واپس کرنے کا مطالبہ کیا تو ملزم نے صرف ایک جزوی رقم واپس کی اور باقی رقم واپس کرنے سے انکار کردیا‘‘۔
ترجمان نے کہا کہ اس سلسلے میں بی این ایس ایکٹ کی دفعہ۳۱۸(۴)‘۳۱۹؍اور(۲)۲۰۳۵۱)کے تحت مقدمہ درج کیا گیا ہے اور دھوکہ باز کو گرفتار کیا گیا ہے ۔ترجمان نے بتایا کہ اس ضمن میں مزید تحقیقات جاری ہے ۔
بیان کے مطابق درخواست گذار کے شوہر ریاض احمد چنہ کے خلاف پی آئی ٹی این ڈی پی ایس ایکٹ کے تحت مقدمہ درج کیا گیا تھا اور وہ اس وقت سب جیل بھدرواہ میں بند ہے ۔