راجیہ سبھا کی چھ سیٹوں کیلئے۲۰دسمبر کو ضمنی انتخابات ہوں گے

نئی دہلی//
الیکشن کمیشن نے راجیہ سبھا کی چھ خالی نشستوں کیلئے۲۰دسمبر کو ضمنی انتخابات کرانے کا اعلان کیا ہے ، جس کیلئے۳دسمبر کو نوٹیفکیشن جاری کیا جائے گا۔
آج یہاں جاری کردہ کمیشن کی ایک پریس ریلیز کے مطابق آندھرا پردیش سے تین اور اوڈیشہ، مغربی بنگال اور ہریانہ سے ایک ایک سیٹ کے لیے انتخابات ہونے ہیں۔
الیکشن کمیشن کے اعلان کردہ پروگرام کے مطابق ان چھ نشستوں کے لئے ضمنی انتخابات کا نوٹیفکیشن۳دسمبر کو جاری کیا جائے گا اور اسی کے ساتھ کاغذات نامزدگی داخل کرانے کا عمل شروع ہو جائے گا۔
کاغذات نامزدگی۱۰دسمبر تک داخل کیے جاسکتے ہیں۔ کاغذات نامزدگی کی جانچ پڑتال۱۱دسمبر کو ہو گی اور۱۳دسمبر تک نام واپس لیے جا سکیں گے ۔
ضرورت پڑنے پر۲۰دسمبر کو صبح ۹بجے سے شام ۴بجے تک ووٹنگ ہوگی۔ ووٹوں کی گنتی اسی دن شام۵بجے ہوگی۔
ضمنی انتخاب کا تمام عمل۲۴دسمبر تک مکمل ہو جائے گا۔