رعناواری میں بھیانک آتشزدگی‘ نصف درجن کے قریب رہائشی مکان خاکستر

سرینگر//
پائین شہر کے گر پورہ رعناواری میں آگ کی ایک واردات میں نصف درجن کے قریب رہائشی مکان خاکستر ہوگئے ۔
فائر اینڈ ایمرجنسی اور مقامی لوگوں کی کوششوں کے نتیجے میں آگ پر قابو پایا گیا۔
اطلاعات کے مطابق پیر کی سہ پہر پائین شہر کے گنجان آبادی والے علاقے گر پورہ رعناواری میں رہائشی شیڈ سے آگ نمودار ہوئی جس نے آناً فاناً اپنے متصل کئی رہائشی مکانوں کو لپیٹ میں لے لیا۔
فائر اینڈ ایمرجنسی اور مقامی لوگوں کی کوششوں کے نتیجے میں گر چہ آگ پر قابو پایا گیا تاہم آتشزدگی کی اس واردات میں نصف درجن کے قریب رہائشی مکان خاکستر ہوئے ہیں۔
عینی شاہدین کے مطابق جوں ہی رہائشی مکان سے آگ نمودار ہوئی تو دیکھتے ہی دیکھتے کئی گیس سلنڈر زور دار دھماکوں کے ساتھ پھٹ گئے جس وجہ سے آگ نے اپنے متصل چھ مکانوں کو لپیٹ میں لے لیا۔
شاہدین نے بتایا کہ آگ کی اس واردات میں لاکھوں روپے مالیت کی اشیاء راکھ کے ڈھیر میں تبدیل ہوئی جبکہ کئی کنبے کھلے آسمان تلے زندگی گزارنے پر اب مجبور ہیں۔
فائر اینڈ ایمرجنسی کے ایک سینئر عہدیدار نے یو این آئی ارد وکو بتایا کہ رعناواری کے گر پورہ میں آگ کی ایک ہولناک واردات میں کئی رہائشی شیڈ خاکستر ہوئے ہیں۔انہوں نے کہاکہ فی الحال فائر عملہ آگ بجھانے کی کارروائی میں مصروف ہے ۔