این سی کانگریس اتحاد حکومت بنانے میں کامیاب ہو گا:قرہ

سرینگر//
جموںکشمیر پردیش کانگریس کے صدر اور سینٹرل شالہ ٹینگ کے امیدوار ‘طارق حمید قرہ نے بدھ کے روز کہاکہ موجود ہ الیکشن غیر معمولی اہمیت کے حامل ہیں لہذا لوگوں کو بڑھ چڑھ کر اس میں حصہ لینا چاہئے ۔
قرہ نے کہا کہ کانگریس اور نیشنل کانفرنس جموں کشمیر میں حکومت بنانے میں کامیاب ہو جائیں گی۔
ان باتوں کا اظہار قرہ نے اپنا ووٹ ڈالنے کے بعد نامہ نگاروں سے بات چیت کے دوران کیا۔
کانگریسی امیدوار نے کہاکہ موجودہ الیکشن تعمیر وترقی کے بجائے اہم مسائل پر لڑے جارہے ہیں کیونکہ جس طرح سے ہمارے حقوق پر ۵؍اگست کو ڈاکہ ڈالا گیا یہاں کے لوگ اس کا سخت جواب دیں گے ۔
قرہ نے کہا ’’آج جموں کشمیر کے لوگ اپنے بہتر مستقبل کیلئے اپنی حق رائے دہی کا استعمال کر رہے ہیں‘‘ ۔انہوں نے مزید بتایا کہ جموں وکشمیر کے لوگوں نے مرکزی حکومت کے غیر آئینی اور غیر جمہوری فیصلے کو مسترد کیا ہے ۔
غیر ملکی سفارتکاروں کی سری نگر آمد پر جب طاریق حمید قرہ سے سوال کیا گیا تو انہوں نے کہاکہ یہاں کے حالات کو دکھانے کی خاطر مرکزی حکومت نے انہیں کشمیر بھیجا ہے ۔ ان کے مطابق جموں وکشمیر میں اگلی سرکار کانگریس اور نیشنل کانفرنس کی ہوگی اوریہ ووٹنگ سے عیاں ہو رہا ہے ۔