جموں میں پٹنی ٹاپ کے قریب جنگلاتی علاقے میں انکاؤنٹر شروع

سرینگر//
جموں کشمیر کے سیاحتی مقام پٹنی ٹاپ کے قریب جنگلاتی علاقے میں منگل کی شام سیکورٹی فورسز اور ملی ٹنٹوں کے درمیان انکاؤنٹر شروع ہو گیا۔
فوج کے ایک ترجمان نے کہا’’خفیہ اطلاعات کی بنیاد پر فوج اور پولیس نے پٹنی ٹاپ کے قریب آکار جنگل میں ایک مشترکہ آپریشن شروع کیا‘‘۔
ترجمان نے کہا کہ’ دہشت گردوں‘ سے رابطہ قائم کر لیا گیا ہے اور آپریشن جاری ہے۔دونوں جانب سے فوری طور پر کسی جانی نقصان کی اطلاع نہیں ہے۔
اس دوران جنوبی کشمیر کے اہلن گڈول کوکرناگ جنگل علاقے میں ملی ٹنٹوں کی تلاش کے لئے منگل کو مسلسل چوتھے روز بھی وسیع پیمانے پر تلاشی آپریشن جاری ہے ۔
بتادیں کہ کوکر ناگ کے اہلن گڈول جنگل علاقے میں ہفتے کے روز سیکورٹی فورسز اور ملی ٹینٹوں کے مابین شدید گولیوں کا تبادلہ ہوا جس کے نتیجے میں دو فوجی جوان جاں بحق جبکہ دو عام شہری بھی زخمی ہوئے جن میں سے ایک زخموں کی تاب نہ لا کر چل بسا۔
جاں بحق ہونے والے جوانوں کی شناخت حوالدر دیپک کمار یادو اور لانس نائیک پروین شرما کے طور پر ہوئی تھی۔
ذرائع کے مطابق کوکر ناگ کے اہلن گڈول علاقے میں آپریشن جاری ہے ۔انہوں نے کہا کہ چونکہ اہلن گڈول کا علاقہ گھنے جنگلات پر محیط ہے جس کے پیش نظر سیکورٹی فورسز کے اہلکار آہستہ آہستہ آگے بڑھ رہے ہیں۔انہوں نے مزید بتایا کہ اضافی کمک کو جنگلی علاقے کی اور روانہ کیا گیا ہے ۔
ان کامزید کہنا ہے کہ جنگلی علاقے میں ڈرون کیمروں کے ذریعے نظر گزر رکھی جارہی ہیں۔
ذرائع نے بتایا کہ ملی ٹنٹوں کی تلاش کے لئے تمام تر وسائل کو بروئے کار لایا جا رہا ہے لیکن جنگل گھنا ہونے کی وجہ سے سیکورٹی فورسز کو گونا گوں مشکلات کا سامنا کرنا پڑ رہا ہے ۔